rifaqaton ka talabgar bhi na hota tha

rifāqatoñ kā talabgār bhī na hotā thā

magar kisī se vo be-zār bhī na hotā thā

kal us ke ḳhvāb the jo aaj apnī duniyā hai

fasānā-sāz fusūñ-kār bhī na hotā thā

subuk-ravī kī vahīñ shart bhī Thahartī thī

jahāñ se rāsta hamvār bhī na hotā thā

mire sirhāne uThātī thiiñ hashr tābīreñ

abhī maiñ ḳhvāb se bedār bhī na hotā thā

havāoñ se thā gurezāñ vo ḳhud-giraftā parind

kisī ke hāthoñ giraftār bhī na hotā thā

nihāñ hoñ aañkh se bārish meñ dauḌte shole

samāñ kuchh itnā dhuāñ-dhār bhī na hotā thā

guzar diloñ se ho sab is havā meñ the lekin

koī kisī kā taraf-dār bhī na hotā thā

mirā sukūt na ho qufl-e-bāb-e-ma.anī 'yās'

bayāñ hurūf kī dīvār bhī na hotā thā

rifaqaton ka talabgar bhi na hota tha

magar kisi se wo be-zar bhi na hota tha

kal us ke KHwab the jo aaj apni duniya hai

fasana-saz fusun-kar bhi na hota tha

subuk-rawi ki wahin shart bhi Thaharti thi

jahan se rasta hamwar bhi na hota tha

mere sirhane uThati thin hashr tabiren

abhi main KHwab se bedar bhi na hota tha

hawaon se tha gurezan wo KHud-girafta parind

kisi ke hathon giraftar bhi na hota tha

nihan hon aankh se barish mein dauDte shole

saman kuchh itna dhuan-dhaar bhi na hota tha

guzar dilon se ho sab is hawa mein the lekin

koi kisi ka taraf-dar bhi na hota tha

mera sukut na ho qufl-e-bab-e-mani 'yas'

bayan huruf ki diwar bhi na hota tha