rihai pa na saka sar-phiri hawaon se main

rihā.ī pā na sakā sar-phirī havāoñ se maiñ

tamām umr ulajhtā rahā sadāoñ se maiñ

lagegā vaqt zarā aañkh kholne meñ mujhe

nikal ke aaya huuñ tārīk-tar guphāoñ se maiñ

hai merī piiTh pe ik haath hausla detā

savāl hī nahīñ ghabrā.ūñ ibtilāoñ se maiñ

sukūn vaqt ke sahrā ko paar kar ke milā

rihā.ī pā gayā lamhoñ kī dhūp-chhāñv se maiñ

kisī ke haath sahārā jo ban ga.e hote

to do qadam bhī na chal paatā apne paaoñ se maiñ

har ek ġham ke samundar ko jast-e-vāhid se

ubuur kartā huuñ ai maañ tirī duāoñ se maiñ

ye sang-zār marī guftugū samajhte haiñ

kalām kartā huuñ ai 'nūr' be-navāoñ se maiñ

rihai pa na saka sar-phiri hawaon se main

tamam umr ulajhta raha sadaon se main

lagega waqt zara aankh kholne mein mujhe

nikal ke aaya hun tarik-tar guphaon se main

hai meri piTh pe ek hath hausla deta

sawal hi nahin ghabraun ibtilaon se main

sukun waqt ke sahra ko par kar ke mila

rihai pa gaya lamhon ki dhup-chhanw se main

kisi ke hath sahaara jo ban gae hote

to do qadam bhi na chal pata apne paon se main

har ek gham ke samundar ko jast-e-wahid se

ubur karta hun ai man teri duaon se main

ye sang-zar mari guftugu samajhte hain

kalam karta hun ai 'nur' be-nawaon se main