rishta kaise TuTta hai KHwab se tabir ka

rishta kaise TūTtā hai ḳhvāb se ta.abīr kā

aao dikhlā.ūñ tumheñ ye khel bhī taqdīr kā

ai musavvir hai yahī hāsil tirī tahrīr kā

husn ḳhud hī pairahan hai husn kī tasvīr kā

ban gayā hai isti.āra husn-e-ālam-gīr kā

ā.ina-dar-ā.ina chehra mirī tahrīr kā

jaise jaise qaid kī mī.ād ghaTtī jā.egī

tañg hotā jā.egā halqa mirī zanjīr kā

ye kitāb-e-dil hai qur.ān-e-mohabbat hai huzūr

marhala dar-pesh hai is husn kī tafsīr kā

sach agar pūchho to mere pīr-o-murshid haiñ yahī

maiñ aqīdat-mañd huuñ 'qaisar' janāb-e-mīr kā

rishta kaise TuTta hai KHwab se tabir ka

aao dikhlaun tumhein ye khel bhi taqdir ka

ai musawwir hai yahi hasil teri tahrir ka

husn KHud hi pairahan hai husn ki taswir ka

ban gaya hai istiara husn-e-alam-gir ka

aaina-dar-aina chehra meri tahrir ka

jaise jaise qaid ki miad ghaTti jaegi

tang hota jaega halqa meri zanjir ka

ye kitab-e-dil hai quran-e-mohabbat hai huzur

marhala dar-pesh hai is husn ki tafsir ka

sach agar puchho to mere pir-o-murshid hain yahi

main aqidat-mand hun 'qaisar' janab-e-mir ka