rishta mein kaun hai wo main is pesh-o-pas mein tha

rishta meñ kaun hai vo maiñ is pesh-o-pas meñ thā

ik shaḳhs us kī seat pe baiThā jo bus meñ thā

mujh se bichhaḌ ke kar lī mohabbat ne ḳhud-kushī

ik zaḳhm raat us kī kalā.ī kī nas meñ thā

shāḳhoñ se us ko ahl-e-havas ne jhapaT liyā

varna vo ek phuul mirī dastaras meñ thā

māhaul ghar kā dekh ke jī aur jal gayā

pahle se saarā jism hī din-bhar umas meñ thā

banjar banā gayā hai taḳhayyul kī sarzamīñ

har qāfiya ġhazal kā hisār-e-havas meñ thā

us kī falak-bulandī-e-parvāz dekh kar

maiñ kaise maan luuñ ki parinda qafas meñ thā

āmāda-e-firāq thā kal raat is qadar

'dilbar' ko rok paanā kahāñ mere bas meñ thā

rishta mein kaun hai wo main is pesh-o-pas mein tha

ek shaKHs us ki seat pe baiTha jo bus mein tha

mujh se bichhaD ke kar li mohabbat ne KHud-kushi

ek zaKHm raat us ki kalai ki nas mein tha

shaKHon se us ko ahl-e-hawas ne jhapaT liya

warna wo ek phul meri dastaras mein tha

mahaul ghar ka dekh ke ji aur jal gaya

pahle se sara jism hi din-bhar umas mein tha

banjar bana gaya hai taKHayyul ki sarzamin

har qafiya ghazal ka hisar-e-hawas mein tha

us ki falak-bulandi-e-parwaz dekh kar

main kaise man lun ki parinda qafas mein tha

aamada-e-firaq tha kal raat is qadar

'dilbar' ko rok pana kahan mere bas mein tha