rishta nahin hai ab koi dar-e-fana ke sath

rishta nahīñ hai ab koī dār-e-fanā ke saath

tā-hashr apnī ḳhaak uḌegī havā ke saath

thūkā thā ḳhuun jis ke liye rāh-e-ishq meñ

ubhrā huuñ us ke haath pe rang-e-hinā ke saath

ai chhoḌ jaane vaale zarā pīchhe muḌ ke dekh

har saañs uḌ rahī hai tirī gard-e-pā ke saath

laa.ī thī jo uḌā ke havā bū-e-zulf-e-yār

le jā rahī hai hosh-o-ḳhirad ab uḌā ke saath

tū hī batā de kaise ziyārat tirī karūñ

chaspāñ hai merī chashm tire naqsh-e-pā ke saath

laatī hai mujh ko khīñch ke chaukhaT pe baar baar

kaisī kashish hai nasb tirī har sadā ke saath

'shahbāz' mere ashk ke kaise bujheñge diip

lau ġham kī mil ga.ī hai muḳhālif havā ke saath

rishta nahin hai ab koi dar-e-fana ke sath

ta-hashr apni KHak uDegi hawa ke sath

thuka tha KHun jis ke liye rah-e-ishq mein

ubhra hun us ke hath pe rang-e-hina ke sath

ai chhoD jaane wale zara pichhe muD ke dekh

har sans uD rahi hai teri gard-e-pa ke sath

lai thi jo uDa ke hawa bu-e-zulf-e-yar

le ja rahi hai hosh-o-KHirad ab uDa ke sath

tu hi bata de kaise ziyarat teri karun

chaspan hai meri chashm tere naqsh-e-pa ke sath

lati hai mujh ko khinch ke chaukhaT pe bar bar

kaisi kashish hai nasb teri har sada ke sath

'shahbaz' mere ashk ke kaise bujhenge dip

lau gham ki mil gai hai muKHalif hawa ke sath