rishton ki kaenat mein simTi hui hun main

rishtoñ kī kā.enāt meñ simTī huī huuñ maiñ

muddat se apne aap ko bhūlī huī huuñ maiñ

maiñ ḳhush-nasīb huuñ mire apnoñ kā saath hai

tanhā.iyoñ se phir bhī kyuuñ lipTī huī huuñ maiñ

dam ghoñTtī rahī huuñ tamannā kā har samay

in hasratoñ kī qabr sajātī rahī huuñ maiñ

aatī hai yaad aap kī mujh ko kabhī kabhī

aisā nahīñ ki aap ko bhūlī huī huuñ maiñ

us chāra-gar ko zaḳhm dikhā.ūñ yā chup rahūñ

is kashmakash meñ aaj bhī uljhī huī huuñ maiñ

huuñ fikrmand aaj ke hālāt dekh kar

beTī kī maañ huuñ is liye sahmī huī huuñ maiñ

jazbāt kaise nazm karūñ apne sher meñ

kab se isī ḳhayāl meñ Duubī huī huuñ maiñ

bekār zindagī meñ ye kaisī ḳhalish 'siyā'

sab kuchh milā hai phir bhī kamī DhūñDhtī huuñ maiñ

rishton ki kaenat mein simTi hui hun main

muddat se apne aap ko bhuli hui hun main

main KHush-nasib hun mere apnon ka sath hai

tanhaiyon se phir bhi kyun lipTi hui hun main

dam ghonTti rahi hun tamanna ka har samay

in hasraton ki qabr sajati rahi hun main

aati hai yaad aap ki mujh ko kabhi kabhi

aisa nahin ki aap ko bhuli hui hun main

us chaara-gar ko zaKHm dikhaun ya chup rahun

is kashmakash mein aaj bhi uljhi hui hun main

hun fikrmand aaj ke haalat dekh kar

beTi ki man hun is liye sahmi hui hun main

jazbaat kaise nazm karun apne sher mein

kab se isi KHayal mein Dubi hui hun main

bekar zindagi mein ye kaisi KHalish 'siya'

sab kuchh mila hai phir bhi kami DhunDhti hun main