rishton ki uljhanon ke bhanwar se nikal gaya

rishtoñ kī uljhanoñ ke bhañvar se nikal gayā

vo shaḳhs aaj apne hī ghar se nikal gayā

pathrīle hādsoñ ne lahū kar diyā use

saudā savād-e-sher kā sar se nikal gayā

mausam javān dekh ke jāgīñ baġhāvateñ

har ik parinda būḌhe shajar se nikal gayā

lafzoñ ke her-pher meñ uljhā rahā jo shaḳhs

vo e.atibār-e-arz-e-hunar se nikal gayā

nauha ham apnī zaat kā likhte to kis tarah

qatra lahū kā dīda-e-tar se nikal gayā

chamkā diye usī ne añdheroñ ke aa.ine

jo bhī savād-e-shām-o-sahar se nikal gayā

sab jī rahe haiñ phir bhī haqīqat hai ye 'nazīr'

har shaḳhs zindagī ke asar se nikal gayā

rishton ki uljhanon ke bhanwar se nikal gaya

wo shaKHs aaj apne hi ghar se nikal gaya

pathrile hadson ne lahu kar diya use

sauda sawad-e-sher ka sar se nikal gaya

mausam jawan dekh ke jagin baghawaten

har ek parinda buDhe shajar se nikal gaya

lafzon ke her-pher mein uljha raha jo shaKHs

wo eatibar-e-arz-e-hunar se nikal gaya

nauha hum apni zat ka likhte to kis tarah

qatra lahu ka dida-e-tar se nikal gaya

chamka diye usi ne andheron ke aaine

jo bhi sawad-e-sham-o-sahar se nikal gaya

sab ji rahe hain phir bhi haqiqat hai ye 'nazir'

har shaKHs zindagi ke asar se nikal gaya