ro raha hun main ki naqd-e-dil gaya

ro rahā huuñ maiñ ki naqd-e-dil gayā

vo ye ḳhush haiñ ik ḳhazāna mil gayā

yaad un kī aa ga.ī jab dil gayā

ik na ik hamdard mujh ko mil gayā

shauq meñ tāqat to dekho zo.af kī

baiThe baiThe maiñ ka.ī manzil gayā

kah gayā koī ye merī qabr par

bevafā hūroñ se jā kar mil gayā

pā-e-rangīñ chūmne ke shauq meñ

ḳhuun ho kar dil hinā meñ mil gayā

aah kī aur un ke dil meñ raah kī

ik qadam chal kar ka.ī manzil gayā

ek parda paḌ gayā mahmil pe aur

jab ġhubār-e-qais tā-mahmil gayā

dil liyā to dard kyoñ rahne diyā

itnā pūchhūñgā agar vo mil gayā

pūchhtā hai koī dil par rakh ke haath

kahiye ab to iztirāb-e-dil gayā

aap to ārām se sote rahe

aur yahāñ nāloñ se aalam hil gayā

uf nigāh-e-yās kā 'muztar' asar

duur tak rotā huā qātil gayā

ro raha hun main ki naqd-e-dil gaya

wo ye KHush hain ek KHazana mil gaya

yaad un ki aa gai jab dil gaya

ek na ek hamdard mujh ko mil gaya

shauq mein taqat to dekho zoaf ki

baiThe baiThe main kai manzil gaya

kah gaya koi ye meri qabr par

bewafa huron se ja kar mil gaya

pa-e-rangin chumne ke shauq mein

KHun ho kar dil hina mein mil gaya

aah ki aur un ke dil mein rah ki

ek qadam chal kar kai manzil gaya

ek parda paD gaya mahmil pe aur

jab ghubar-e-qais ta-mahmil gaya

dil liya to dard kyon rahne diya

itna puchhunga agar wo mil gaya

puchhta hai koi dil par rakh ke hath

kahiye ab to iztirab-e-dil gaya

aap to aaram se sote rahe

aur yahan nalon se aalam hil gaya

uf nigah-e-yas ka 'muztar' asar

dur tak rota hua qatil gaya