rog maine bhi kai jaan ko lagae barson

rog maiñ ne bhī ka.ī jaañ ko lagā.e barsoñ

jaane vaale bhī nahīñ lauT ke aa.e barsoñ

āḳhirash taab mashaqqat kī na āñkhoñ meñ rahī

maiñ ne rozī kī tarah ḳhvāb kamā.e barsoñ

dhuul jazboñ kī haTā.ī to ye ehsās huā

is mohabbat meñ shab-o-roz gañvā.e barsoñ

tū nahīñ thā to muqaddar bhī ġhunūda hī rahe

Thokareñ maar ke bhī ham ne jagā.e barsoñ

us kī āñkhoñ se kisī taur añdherā na gayā

diip jis ke liye ḳhuuñ se bhī jalā.e barsoñ

ruuTh kar shahr-e-ḳhamoshāñ ko ga.e aate nahīñ

hichkiyāñ le ke koī chāhe manā.e barsoñ

maiñ bhī sah paayā nahīñ terī judā.ī ko 'hasan'

aur is dil se bhī uThtī rahī haa.e barsoñ

rog main ne bhi kai jaan ko lagae barson

jaane wale bhi nahin lauT ke aae barson

aaKHirash tab mashaqqat ki na aankhon mein rahi

main ne rozi ki tarah KHwab kamae barson

dhul jazbon ki haTai to ye ehsas hua

is mohabbat mein shab-o-roz ganwae barson

tu nahin tha to muqaddar bhi ghunuda hi rahe

Thokaren mar ke bhi hum ne jagae barson

us ki aankhon se kisi taur andhera na gaya

dip jis ke liye KHun se bhi jalae barson

ruTh kar shahr-e-KHamoshan ko gae aate nahin

hichkiyan le ke koi chahe manae barson

main bhi sah paya nahin teri judai ko 'hasan'

aur is dil se bhi uThti rahi hae barson