roko ye wahshaton ka bahao kisi tarah

roko ye vahshatoñ kā bahāo kisī tarah

kashtī ko nāḳhudā se bachāo kisī tarah

ye amn kā chaman ḳhas-o-ḳhāshāk ho na jaa.e

barso mohabbatoñ kī ghatāo kisī tarah

kab tak phiroge dar-badarī kā junūñ liye

dil meñ jagah kisī ke banāo kisī tarah

hotī nahīñ haiñ kam kisī sūrat bhī nafrateñ

is ḳhār-o-ḳhas meñ aag lagāo kisī tarah

āñkhoñ meñ āñsuoñ kā ḳhazāna nahīñ rahā

phir de koī judā.ī ke ghaav kisī tarah

ye qahqahoñ kī khokhlī barsāt ḳhatm ho

andar ke aadmī ko rulāo kisī tarah

ashkoñ kā tohfa pesh karo un ke rū-ba-rū

sūraj ko bhī charāġh dikhāo kisī tarah

roko ye wahshaton ka bahao kisi tarah

kashti ko naKHuda se bachao kisi tarah

ye amn ka chaman KHas-o-KHashak ho na jae

barso mohabbaton ki ghatao kisi tarah

kab tak phiroge dar-badari ka junun liye

dil mein jagah kisi ke banao kisi tarah

hoti nahin hain kam kisi surat bhi nafraten

is KHar-o-KHas mein aag lagao kisi tarah

aankhon mein aansuon ka KHazana nahin raha

phir de koi judai ke ghaw kisi tarah

ye qahqahon ki khokhli barsat KHatm ho

andar ke aadmi ko rulao kisi tarah

ashkon ka tohfa pesh karo un ke ru-ba-ru

suraj ko bhi charagh dikhao kisi tarah