roz-e-hisab sab ko shikayat hai aap se

roz-e-hisāb sab ko shikāyat hai aap se

ab dekhiye ki kis ko mohabbat hai aap se

sumbul ho gul ho sarv ho nargis ki bū-e-gul

har chiiz gulsitāñ kī ibārat hai aap se

gul hoñ ki mehr-o-māh hoñ anjum ki sham-e-bazm

miltī huī har ek kī sūrat hai aap se

fikr-e-ma.āsh fikr-e-suḳhan fikr-e-dahr hai

vābasta ab to merī tabī.at hai aap se

ab gulsitān-e-dahr kyā bāġh-e-iram se bhī

maiñ be-niyāz huuñ mujhe nisbat hai aap se

sajda sanam-kade meñ ho yā kohsār meñ

mansūb sirf merī ibādat hai aap se

maiñ dekhtā huuñ har hasīñ sūrat meñ aap ko

nikhrā huā ye husn-e-basīrat hai aap se

muḳhtār aap the mire vaqt-e-gunāh bhī

phir bhī huzūr mujh ko nadāmat hai aap se

poshīda aap se to nahīñ hai 'shifā' kā haal

vo aap kā hai us ko aqīdat hai aap se

roz-e-hisab sab ko shikayat hai aap se

ab dekhiye ki kis ko mohabbat hai aap se

sumbul ho gul ho sarw ho nargis ki bu-e-gul

har chiz gulsitan ki ibarat hai aap se

gul hon ki mehr-o-mah hon anjum ki sham-e-bazm

milti hui har ek ki surat hai aap se

fikr-e-maash fikr-e-suKHan fikr-e-dahr hai

wabasta ab to meri tabiat hai aap se

ab gulsitan-e-dahr kya bagh-e-iram se bhi

main be-niyaz hun mujhe nisbat hai aap se

sajda sanam-kade mein ho ya kohsar mein

mansub sirf meri ibaadat hai aap se

main dekhta hun har hasin surat mein aap ko

nikhra hua ye husn-e-basirat hai aap se

muKHtar aap the mere waqt-e-gunah bhi

phir bhi huzur mujh ko nadamat hai aap se

poshida aap se to nahin hai 'shifa' ka haal

wo aap ka hai us ko aqidat hai aap se