roz-e-wahshat hai mere shahr mein virani ki

roz-e-vahshat hai mire shahr meñ vīrānī kī

ab koī baat nahīñ baat pareshānī kī

mere dariyā kabhī dariyā bhī huā karte the

ab bhī āvāz sī aatī hai mujhe paanī kī

ā.ina-ḳhāne ke bāhar vo mujhe pūchhte haiñ

ā.ina-ḳhāne meñ kyā baat thī hairānī kī

ab ġhazālāñ se kaho chhup ke kahīñ baiTh raheñ

aamad aamad hai kisī ġhūl-e-bayābānī kī

ham khule ghar ke makīnoñ kī yahī aadat hai

ham na darbān hue aur na darbānī kī

yaad kar lenā bahattar kī kahānī 'bāqī'

jañg chhiḌ jaa.e kisī vaqt agar paanī kī

roz-e-wahshat hai mere shahr mein virani ki

ab koi baat nahin baat pareshani ki

mere dariya kabhi dariya bhi hua karte the

ab bhi aawaz si aati hai mujhe pani ki

aaina-KHane ke bahar wo mujhe puchhte hain

aaina-KHane mein kya baat thi hairani ki

ab ghazalan se kaho chhup ke kahin baiTh rahen

aamad aamad hai kisi ghul-e-bayabani ki

hum khule ghar ke makinon ki yahi aadat hai

hum na darban hue aur na darbani ki

yaad kar lena bahattar ki kahani 'baqi'

jang chhiD jae kisi waqt agar pani ki