roz-o-shab hai meri justuju aaina

roz-o-shab hai mirī justujū aa.ina

dasht-o-koh-o-daman kū-ba-kū aa.ina

aks-dar-aks phailā hai ik silsila

ālam-e-hū meñ hai ek hū aa.ina

dekh apne bhī aa kar muqābil kabhī

roz rakhtā hai tū rū-ba-rū aa.ina

kuchh hameñ bhī batā kuchh hameñ bhī sunā

tujh se kartā hai kyā guftugū aa.ina

jo bhī hai saaf kah de munāfiq na ban

dekh motī sī hai aabrū aa.ina

hāsidoñ ke jo tīroñ se dil par lageñ

zaḳhm kartā hai vo bhī rafū aa.ina

muddatoñ baad 'ḳhusrav' ye mujh par khulā

maiñ tirā aks merā hai tū aa.ina

roz-o-shab hai meri justuju aaina

dasht-o-koh-o-daman ku-ba-ku aaina

aks-dar-aks phaila hai ek silsila

aalam-e-hu mein hai ek hu aaina

dekh apne bhi aa kar muqabil kabhi

roz rakhta hai tu ru-ba-ru aaina

kuchh hamein bhi bata kuchh hamein bhi suna

tujh se karta hai kya guftugu aaina

jo bhi hai saf kah de munafiq na ban

dekh moti si hai aabru aaina

hasidon ke jo tiron se dil par lagen

zaKHm karta hai wo bhi rafu aaina

muddaton baad 'KHusraw' ye mujh par khula

main tera aks mera hai tu aaina