roz tujhko yaad karne ki tamanna bhi nahin

roz tujh ko yaad karne kī tamannā bhī nahīñ

bhuul jaane kā magar ham meñ kaleja bhī nahīñ

ġhaib hī se mo'jiza ho baat tab shāyad bane

dasht-e-imkān meñ khaḌā huuñ aur rasta bhī nahīñ

zaḳhm bhī riste nahīñ tanz-e-zamāna be-asar

hai maraz merā yagāna duur hotā bhī nahīñ

paḌ na jaanā 'ishq meñ tum shā’iroñ ke jaan lo

kab ġhazal kar deñ ye ḳhārij kuchh bharosa bhī nahīñ

nik.hat-e-gul kī tarah bikhrā diyā us kā pata

muntashir huuñ 'ishq rakhne kā salīqa bhī nahīñ

zaat meñ merī udāsī kā hai naqsh-e-mo’tabar

zaat meñ merī ḳhushī kā to Thikānā bhī nahīñ

aag chūlhe kī jalī to ḳhvāhisheñ īñdhan banīñ

raakh hī meñ dab gayā sho’la jo bhaḌkā bhī nahīñ

roz tujh ko yaad karne ki tamanna bhi nahin

bhul jaane ka magar hum mein kaleja bhi nahin

ghaib hi se mo'jiza ho baat tab shayad bane

dasht-e-imkan mein khaDa hun aur rasta bhi nahin

zaKHm bhi riste nahin tanz-e-zamana be-asar

hai maraz mera yagana dur hota bhi nahin

paD na jaana 'ishq mein tum sha’iron ke jaan lo

kab ghazal kar den ye KHarij kuchh bharosa bhi nahin

nikhat-e-gul ki tarah bikhra diya us ka pata

muntashir hun 'ishq rakhne ka saliqa bhi nahin

zat mein meri udasi ka hai naqsh-e-mo’tabar

zat mein meri KHushi ka to Thikana bhi nahin

aag chulhe ki jali to KHwahishen indhan banin

rakh hi mein dab gaya sho’la jo bhaDka bhi nahin