roz tufan ko guzara main karun

roz tūfāñ ko guzārā maiñ karūñ

aur phir ghar ko sañvārā maiñ karūñ

ek ummīd kā tinkā hī sahī

ḳhud ko us se hī ubhārā maiñ karūñ

muntazir hai merā sailāb abhī

us kī zid hai ki ishāra maiñ karūñ

dhuup hī dhuup ho to mushkil hai

kaise saa.e se kināra maiñ karūñ

mas.ala ik dafa meñ bas ye hai

dil to chāhegā dobāra maiñ karūñ

merī ḳhāmoshī nidā hai merī

har ghaḌī ḳhud ko pukārā maiñ karūñ

maiñ kabhī haar ke bhī jīt.tā huuñ

vo kabhī jiit ke haarā maiñ karūñ

zindagī ko thamā ke jām-e-mai

zahr ko zahr se maarā maiñ karūñ

ab bhī kuchh baaqī hai terā merā

kyoñ na is ko bhī hamārā maiñ karūñ

roz tufan ko guzara main karun

aur phir ghar ko sanwara main karun

ek ummid ka tinka hi sahi

KHud ko us se hi ubhaara main karun

muntazir hai mera sailab abhi

us ki zid hai ki ishaara main karun

dhup hi dhup ho to mushkil hai

kaise sae se kinara main karun

masala ek dafa mein bas ye hai

dil to chahega dobara main karun

meri KHamoshi nida hai meri

har ghaDi KHud ko pukara main karun

main kabhi haar ke bhi jitta hun

wo kabhi jit ke haara main karun

zindagi ko thama ke jam-e-mai

zahr ko zahr se mara main karun

ab bhi kuchh baqi hai tera mera

kyon na is ko bhi hamara main karun