rozana koi kasa gadai ka uTha kar

rozāna koī kaasa gadā.ī kā uThā kar

kūche se guzar jaatā hai āvāz lagā kar

ye kaisā sitam hai ki dikhā.ī na de mujh ko

vo shaḳhs jo niklā nahīñ siine meñ samā kar

dil kis kī tasallī ke liye jalne lagā thā

dil kis ke liye raakh huā ḳhud ko jalā kar

ik ā.ina-bardār ke māthe pe likhā thā

sach bol magar jhuuT kī shīrīnī milā kar

duniyā kā har ik sāhab-o-muḳhtār bhī tujh sā

insān hai insāñ ko banāyā na ḳhudā kar

ye hijr-e-musalsal rahā ā.īn-e-mohabbat

is dard kī talḳhī se pareshāñ na huā kar

'ādil' ye sar-e-shām kahāñ jaane lagā hai

tū suut kī dastār meñ paivand lagā kar

rozana koi kasa gadai ka uTha kar

kuche se guzar jata hai aawaz laga kar

ye kaisa sitam hai ki dikhai na de mujh ko

wo shaKHs jo nikla nahin sine mein sama kar

dil kis ki tasalli ke liye jalne laga tha

dil kis ke liye rakh hua KHud ko jala kar

ek aaina-bardar ke mathe pe likha tha

sach bol magar jhuT ki shirini mila kar

duniya ka har ek sahab-o-muKHtar bhi tujh sa

insan hai insan ko banaya na KHuda kar

ye hijr-e-musalsal raha aain-e-mohabbat

is dard ki talKHi se pareshan na hua kar

'adil' ye sar-e-sham kahan jaane laga hai

tu sut ki dastar mein paiwand laga kar