ruka na gham ka jo sail-e-rawan to kya hoga

rukā na ġham kā jo sail-e-ravāñ to kyā hogā

uThā badan se agarche dhuāñ to kyā hogā

dayār-e-ishq meñ aane ko aa to jā.ūñ magar

milā na aap kā nām-o-nishāñ to kyā hogā

utar rahe haiñ falak se hayāt ke jugnū

junūñ meñ Dhal ga.e vahm-o-gumāñ to kyā hogā

libās-e-nau meñ hai gulshan kā har shajar lekin

agar ḳhizāñ ne liyā imtihāñ to kyā hogā

zabāñ pe pahrā ḳhirad ne lagā diyā hai magar

lahū ne de diyā apnā bayāñ to kyā hogā

badan ko aa.ina tum ne banā liyā to kyā

kisī ne khol dī apnī zabāñ to kyā hogā

abhī nihāñ hai har ik zaḳhm-e-dil lahū meñ 'qamar'

mahak uThā jo ye zaḳhm-e-nihāñ to kyā hogā

ruka na gham ka jo sail-e-rawan to kya hoga

uTha badan se agarche dhuan to kya hoga

dayar-e-ishq mein aane ko aa to jaun magar

mila na aap ka nam-o-nishan to kya hoga

utar rahe hain falak se hayat ke jugnu

junun mein Dhal gae wahm-o-guman to kya hoga

libas-e-nau mein hai gulshan ka har shajar lekin

agar KHizan ne liya imtihan to kya hoga

zaban pe pahra KHirad ne laga diya hai magar

lahu ne de diya apna bayan to kya hoga

badan ko aaina tum ne bana liya to kya

kisi ne khol di apni zaban to kya hoga

abhi nihan hai har ek zaKHm-e-dil lahu mein 'qamar'

mahak uTha jo ye zaKHm-e-nihan to kya hoga