ruka sa tha koi manzar magar Thahra nahin tha

rukā sā thā koī manzar magar Thahrā nahīñ thā

laraztī yaad kā aañsū thā aur bahtā nahīñ thā

samajhte the vo kam-āmezī-e-darvāza-e-dil

bahut dastak thī lekin zaḳhm-e-āvāza nahīñ thā

basārat meñ kisī nādīda vahshat kī raḌak thī

bhaTaktī aañkh meñ kis dasht kā TukḌā nahīñ thā

sabā hamrāh-e-sat.h-e-āb maiñ bahtā kahāñ tak

tamanna ghul rahī thī aur badan sachchā nahīñ thā

khulā phir raat ke kohre pe āḳhir raat kho kar

havā ke haath meñ jo 'aks thā us kā nahīñ thā

sulagtī raat kī raanī lapaT kī aas meñ thī

bujhī rut kī hathelī par diyā khiltā nahīñ thā

hamī betāb the zarre kā taarā tāpte the

ḳhudā ke aa.ine meñ kaun sā sahrā nahīñ thā

ruka sa tha koi manzar magar Thahra nahin tha

larazti yaad ka aansu tha aur bahta nahin tha

samajhte the wo kam-amezi-e-darwaza-e-dil

bahut dastak thi lekin zaKHm-e-awaza nahin tha

basarat mein kisi nadida wahshat ki raDak thi

bhaTakti aankh mein kis dasht ka TukDa nahin tha

saba hamrah-e-sath-e-ab main bahta kahan tak

tamanna ghul rahi thi aur badan sachcha nahin tha

khula phir raat ke kohre pe aaKHir raat kho kar

hawa ke hath mein jo 'aks tha us ka nahin tha

sulagti raat ki rani lapaT ki aas mein thi

bujhi rut ki hatheli par diya khilta nahin tha

hami betab the zarre ka tara tapte the

KHuda ke aaine mein kaun sa sahra nahin tha