ruKH apni tamannaon ka ab moD raha hun

ruḳh apnī tamannāoñ kā ab moḌ rahā huuñ

ik TuuTe hue shaḳhs ko maiñ joḌ rahā huuñ

manzil kā ta.ayyun hai na sāñsoñ kā bharosa

maiñ vaqt kī taqlīd meñ bas dauḌ rahā huuñ

maiñ auroñ ke hisse ke bhī dam phūñk na jā.ūñ

ye soch ke jaldī se maiñ dam toḌ rahā huuñ

jis sehr ne toḌā hai mujhe haal meñ aa kar

maazī meñ usī sehr kā maiñ toḌ rahā huuñ

insān kī takmīl hai rah jaanā adhūrā

kuchh kaam adhūre maiñ tabhī chhoḌ rahā huuñ

jis shāḳh ko chhūne se huā ḳhuld se bāhar

maiñ aaj bhī us shāḳh se phal toḌ rahā huuñ

ik ġham se hai ashkoñ ke ta.alluq kī vazāhat

maiñ ashk se patthar ko agar toḌ rahā huuñ

jiddat kā taqāza hai ulaT baat tū 'kāzim'

dīvār ko maiñ sar se miyāñ phoḌ rahā huuñ

ruKH apni tamannaon ka ab moD raha hun

ek TuTe hue shaKHs ko main joD raha hun

manzil ka tayyun hai na sanson ka bharosa

main waqt ki taqlid mein bas dauD raha hun

main auron ke hisse ke bhi dam phunk na jaun

ye soch ke jaldi se main dam toD raha hun

jis sehr ne toDa hai mujhe haal mein aa kar

mazi mein usi sehr ka main toD raha hun

insan ki takmil hai rah jaana adhura

kuchh kaam adhure main tabhi chhoD raha hun

jis shaKH ko chhune se hua KHuld se bahar

main aaj bhi us shaKH se phal toD raha hun

ek gham se hai ashkon ke talluq ki wazahat

main ashk se patthar ko agar toD raha hun

jiddat ka taqaza hai ulaT baat tu 'kazim'

diwar ko main sar se miyan phoD raha hun