ruKH-e-hayat pe rang-e-malal ab bhi hai

ruḳh-e-hayāt pe rang-e-malāl ab bhī hai

kisī ko bhūlnā kār-e-muhāl ab bhī hai

na jaane kab se hai sahrāoñ kā safar darpesh

magar ye dil hai ki dariyā-misāl ab bhī hai

nibhā rahā hai ta.alluq rafīq-e-derīna

ġham-e-nafas ko hamārā ḳhayāl ab bhī hai

ridā-e-zaḳhm se kal bhī damak rahā thā badan

nigār-ḳhānā-e-hastī nihāl ab bhī hai

darāz-dastī-e-shām-e-firāq se kah do

ki merī ruuh meñ kaif-e-visāl ab bhī hai

milā to hai vo ba-zāhir tapāk se lekin

nigāh kahtī hai shīshe meñ baal ab bhī hai

zabāñ-burīdoñ ke tevar batā rahe haiñ 'rāz'

nigāh-o-lab pe vo harf-e-savāl ab bhī hai

ruKH-e-hayat pe rang-e-malal ab bhi hai

kisi ko bhulna kar-e-muhaal ab bhi hai

na jaane kab se hai sahraon ka safar darpesh

magar ye dil hai ki dariya-misal ab bhi hai

nibha raha hai talluq rafiq-e-derina

gham-e-nafas ko hamara KHayal ab bhi hai

rida-e-zaKHm se kal bhi damak raha tha badan

nigar-KHana-e-hasti nihaal ab bhi hai

daraaz-dasti-e-sham-e-firaq se kah do

ki meri ruh mein kaif-e-visal ab bhi hai

mila to hai wo ba-zahir tapak se lekin

nigah kahti hai shishe mein baal ab bhi hai

zaban-buridon ke tewar bata rahe hain 'raaz'

nigah-o-lab pe wo harf-e-sawal ab bhi hai