ruKH-e-rangin pe ashkon ki rawani ab bhi hoti hai

ruḳh-e-rangīñ pe ashkoñ kī ravānī ab bhī hotī hai

sunā hai mujh pe un kī mehrbānī ab bhī hotī hai

sukūt-e-ishq iz.hār-e-tamannā ab bhī kartā hai

nigāh-e-nāz sarf-e-lan-tarānī ab bhī hotī hai

taġhāful ne kisī ke kar diyā bezār jiine se

magar ummīd vaj.h-e-zindagānī ab bhī hotī hai

sitāre be-palak jhapkā.e sunte haiñ ye afsāna

lab-e-mahtāb par tirī kahānī ab bhī hotī hai

bahāroñ ko jo luuTe vo javānī ab na ho lekin

bahāreñ jis ko lūTeñ vo javānī ab bhī hotī hai

ye maanā rāz-e-dil kah kar dil apnā kar liyā halkā

magar mahsūs un kī sar-girānī ab bhī hotī hai

tire va.ade badal sakte nahīñ merī tabī.at ko

tire va.adoñ pe aksar bad-gumānī ab bhī hotī hai

umīdeñ haiñ charāġh-e-rahguzar in kā bharosa kyā

basar tārīkiyoñ meñ zindagānī ab bhī hotī hai

samajhte the jo āñkhoñ kī zabāñ vo ab kahāñ lekin

nigāhoñ se diloñ kī tarjumānī ab bhī hotī hai

jise sunte the ham tum chāñd kī ThanDī shuāoñ meñ

sitāroñ kī zabāñ par vo kahānī ab bhī hotī hai

huī muddat ki zaḳhm-e-ārzū murjhā ga.e lekin

mirī sūrat tire ġham kī nishānī ab bhī hotī hai

chaman vāloñ ke ādāb-e-junūñ kā mo.ajiza kahiye

ki dāmān-e-ḳhizāñ se gul-fishānī ab bhī hotī hai

bahut kuchh de chukī hai zindagī ko us kā haq duniyā

magar be-kaif muflis ko javānī ab bhī hotī hai

mire ashkoñ se 'safdar' ab bhī bhar jaatā hai jaam apnā

baġhair un ke mai-e-gul-rang paanī ab bhī hotī hai

ruKH-e-rangin pe ashkon ki rawani ab bhi hoti hai

suna hai mujh pe un ki mehrbani ab bhi hoti hai

sukut-e-ishq izhaar-e-tamanna ab bhi karta hai

nigah-e-naz sarf-e-lan-tarani ab bhi hoti hai

taghaful ne kisi ke kar diya bezar jine se

magar ummid wajh-e-zindagani ab bhi hoti hai

sitare be-palak jhapkae sunte hain ye afsana

lab-e-mahtab par teri kahani ab bhi hoti hai

bahaaron ko jo luTe wo jawani ab na ho lekin

bahaaren jis ko luTen wo jawani ab bhi hoti hai

ye mana raaz-e-dil kah kar dil apna kar liya halka

magar mahsus un ki sar-girani ab bhi hoti hai

tere wade badal sakte nahin meri tabiat ko

tere wadon pe aksar bad-gumani ab bhi hoti hai

umiden hain charagh-e-rahguzar in ka bharosa kya

basar tarikiyon mein zindagani ab bhi hoti hai

samajhte the jo aankhon ki zaban wo ab kahan lekin

nigahon se dilon ki tarjumani ab bhi hoti hai

jise sunte the hum tum chand ki ThanDi shuaon mein

sitaron ki zaban par wo kahani ab bhi hoti hai

hui muddat ki zaKHm-e-arzu murjha gae lekin

meri surat tere gham ki nishani ab bhi hoti hai

chaman walon ke aadab-e-junun ka moajiza kahiye

ki daman-e-KHizan se gul-fishani ab bhi hoti hai

bahut kuchh de chuki hai zindagi ko us ka haq duniya

magar be-kaif muflis ko jawani ab bhi hoti hai

mere ashkon se 'safdar' ab bhi bhar jata hai jam apna

baghair un ke mai-e-gul-rang pani ab bhi hoti hai