ruKH kisi aur ki jaanib hai ishaare kuchh aur

ruḳh kisī aur kī jānib hai ishāre kuchh aur

shahr meñ chāhne vaale haiñ tumhāre kuchh aur

itnī jaldī nahīñ is raat meñ aatā hai qarār

dil se kah do ki shab-e-hijr ko vaare kuchh aur

saath rahtā hai bahut roz koī 'ishq meñ kab

haiñ jo kuchh aur tumhāre to hamāre kuchh aur

ho ga.iiñ yaad tirī āyateñ kuchh aur hameñ

paḌh liye ham ne tire 'ishq ke paare kuchh aur

maiñ to samjhā thā ki ab raat hai jaane vaalī

āḳhir-e-shab nikal aa.e haiñ sitāre kuchh aur

ek āvāz pe dīvāne kahāñ lauTe haiñ

mere aahū se kaho mujh ko pukāre kuchh aur

ḳhatm hotā hī nahīñ silsila-e-tishna-labī

log maujūd haiñ dariyā ke kināre kuchh aur

aaj kī raat vo baiThā hai mire pahlū meñ

aaj kī raat falak chāñd utāre kuchh aur

itnā āsāñ nahīñ zanjīr banānā is kā

pech vo aur de gesū ko sañvāre kuchh aur

phir tirā mulk rahegā na tirā taaj na taḳht

baḌh ga.e shahr meñ gar zulm ke maare kuchh aur

de mire haath meñ ab apnī mohabbat kā 'asā

'umr kā tai ho safar is ke sahāre kuchh aur

shahr meñ ḳhush-tanoñ ḳhush-pairahanoñ kī ḳhātir

'ishq meñ phir se uThā lūñgā ḳhasāre kuchh aur

ruKH kisi aur ki jaanib hai ishaare kuchh aur

shahr mein chahne wale hain tumhaare kuchh aur

itni jaldi nahin is raat mein aata hai qarar

dil se kah do ki shab-e-hijr ko ware kuchh aur

sath rahta hai bahut roz koi 'ishq mein kab

hain jo kuchh aur tumhaare to hamare kuchh aur

ho gain yaad teri aayaten kuchh aur hamein

paDh liye hum ne tere 'ishq ke pare kuchh aur

main to samjha tha ki ab raat hai jaane wali

aaKHir-e-shab nikal aae hain sitare kuchh aur

ek aawaz pe diwane kahan lauTe hain

mere aahu se kaho mujh ko pukare kuchh aur

KHatm hota hi nahin silsila-e-tishna-labi

log maujud hain dariya ke kinare kuchh aur

aaj ki raat wo baiTha hai mere pahlu mein

aaj ki raat falak chand utare kuchh aur

itna aasan nahin zanjir banana is ka

pech wo aur de gesu ko sanware kuchh aur

phir tera mulk rahega na tera taj na taKHt

baDh gae shahr mein gar zulm ke mare kuchh aur

de mere hath mein ab apni mohabbat ka 'asa

'umr ka tai ho safar is ke sahaare kuchh aur

shahr mein KHush-tanon KHush-pairahanon ki KHatir

'ishq mein phir se uTha lunga KHasare kuchh aur