ruKH pe bhuli hui pahchan ka Dar to aaya

ruḳh pe bhūlī huī pahchān kā Dar to aayā

kam se kam bhiiḌ meñ ik shaḳhs nazar to aayā

na sahī shahr-e-amāñ zehan kā kuufa hī sahī

ghor jañgal kī masāfat meñ nagar to aayā

kaT gayā mujh se mirī zaat kā rishta lekin

mujh ko is shahr meñ jiine kā hunar to aayā

mere siine kī taraf ḳhud mire nāḳhun lapke

āḳhir is zaḳhm kī Tahnī pe samar to aayā

kuchh to so.e hue ehsās ke baazū thirke

ab ke paanī kā bhañvar tā-ba-kamar to aayā

band kamre kī umas kuchh to shanāsā niklī

sub.h ke saath kā bhaTkā huā ghar to aayā

tan kī miTTī meñ ugā zahr kā paudā chup-chāp

mujh meñ badlī huī duniyā kā asar to aayā

ruKH pe bhuli hui pahchan ka Dar to aaya

kam se kam bhiD mein ek shaKHs nazar to aaya

na sahi shahr-e-aman zehan ka kufa hi sahi

ghor jangal ki masafat mein nagar to aaya

kaT gaya mujh se meri zat ka rishta lekin

mujh ko is shahr mein jine ka hunar to aaya

mere sine ki taraf KHud mere naKHun lapke

aaKHir is zaKHm ki Tahni pe samar to aaya

kuchh to soe hue ehsas ke bazu thirke

ab ke pani ka bhanwar ta-ba-kamar to aaya

band kamre ki umas kuchh to shanasa nikli

subh ke sath ka bhaTka hua ghar to aaya

tan ki miTTi mein uga zahr ka pauda chup-chap

mujh mein badli hui duniya ka asar to aaya