ruKH pe haya ka rang-e-shahabi naqab sa

ruḳh pe hayā kā rang-e-shahābī naqāb sā

iz.hār ke laboñ pe laraztā hijāb sā

chehra ki jaise ek sahīfa ho nuur kā

lahja na.ī ġhazal kī navelī kitāb sā

sadiyoñ kī furqatoñ meñ mujhe qaid kar gayā

vo lamha-e-visāl ki thā jo sarāb sā

maiñ thā hisār-e-zāt kī ḳhāmoshiyoñ meñ gum

chheḌā hai aaj kis ne ye dil kā rubāb sā

sadiyoñ kī ik tavīl rifāqat ke bāvajūd

haiñ vo hī fāsle se vahī ijtināb sā

vo pichhle inqalāb hī kyā de ga.e hameñ

ik laao inqalāb jo ho inqalāb sā

'sajjād' apne hosh-o-ḳhirad ko bachā.iyo

saaqī banā huā hai jo ḳhud hai sharāb sā

ruKH pe haya ka rang-e-shahabi naqab sa

izhaar ke labon pe larazta hijab sa

chehra ki jaise ek sahifa ho nur ka

lahja nai ghazal ki naweli kitab sa

sadiyon ki furqaton mein mujhe qaid kar gaya

wo lamha-e-visal ki tha jo sarab sa

main tha hisar-e-zat ki KHamoshiyon mein gum

chheDa hai aaj kis ne ye dil ka rubab sa

sadiyon ki ek tawil rifaqat ke bawajud

hain wo hi fasle se wahi ijtinab sa

wo pichhle inqalab hi kya de gae hamein

ek lao inqalab jo ho inqalab sa

'sajjad' apne hosh-o-KHirad ko bachaiyo

saqi bana hua hai jo KHud hai sharab sa