ruKHsar ko hai zulf-e-shikan-dar-shikan se rabt

ruḳhsār ko hai zulf-e-shikan-dar-shikan se rabt

ya.anī hai shaiḳh-e-ka.aba ko ab barhaman se rabt

yūñhī hai mujh ko us but-e-paimāñ-shikan se rabt

hai chand roza ruuh kā jaise badan se rabt

phūloñ ko jis tarah ho bahār-e-chaman se rabt

yūñhī thā mujh ko bhī kisī gul-pairahan se rabt

rakhtā nahīñ huuñ sirf husain-o-hasan se rabt

hai mujh ko chaar yaar se aur panjatan se rabt

ḳhushiyāñ manā.eñ ġhair na is irtibāt par

mujh se bhī thā kabhī but-e-paimāñ-shikan se rabt

hamd-o-sanā meñ terī maiñ ratb-ul-lisāñ rahūñ

jab tak rahe dahan meñ zabāñ ko suḳhan se rabt

dīvāna chashm-o-gesu-e-mushkīñ kā huuñ tire

rakhtā huuñ is liye maiñ ġhazāl-e-ḳhutan se rabt

ham bhī kisī ke tīr-e-nazar ke shikār the

ham ko bhī thā kabhī kisī nāvak-fagan se rabt

kis darja tuul hai shab-e-tār-e-firāq-e-yār

shāyad hai us ko zulf-e-shikan-dar-shikan se rabt

tīr-e-nazar se dil ko na chhalnī banāo 'badr'

achchhā nahīñ hai is but-e-nāvak-fagan se rabt

ruKHsar ko hai zulf-e-shikan-dar-shikan se rabt

yani hai shaiKH-e-kaba ko ab barhaman se rabt

yunhi hai mujh ko us but-e-paiman-shikan se rabt

hai chand roza ruh ka jaise badan se rabt

phulon ko jis tarah ho bahaar-e-chaman se rabt

yunhi tha mujh ko bhi kisi gul-pairahan se rabt

rakhta nahin hun sirf husain-o-hasan se rabt

hai mujh ko chaar yar se aur panjatan se rabt

KHushiyan manaen ghair na is irtibaat par

mujh se bhi tha kabhi but-e-paiman-shikan se rabt

hamd-o-sana mein teri main ratb-ul-lisan rahun

jab tak rahe dahan mein zaban ko suKHan se rabt

diwana chashm-o-gesu-e-mushkin ka hun tere

rakhta hun is liye main ghazal-e-KHutan se rabt

hum bhi kisi ke tir-e-nazar ke shikar the

hum ko bhi tha kabhi kisi nawak-fagan se rabt

kis darja tul hai shab-e-tar-e-firaq-e-yar

shayad hai us ko zulf-e-shikan-dar-shikan se rabt

tir-e-nazar se dil ko na chhalni banao 'badr'

achchha nahin hai is but-e-nawak-fagan se rabt