ruKHsat hui jawani naqsha badal raha hai

ruḳhsat huī javānī naqsha badal rahā hai

thā naaz tum ko jis par vo husn Dhal rahā hai

ho jaa.e kuchh se kuchh to kyā hai maqām-e-hairat

ik ek pal meñ rang-e-duniyā badal rahā hai

hai dil-lagī kisī kī hāl-e-zabūñ kisī kā

hañstī hai sham'-e-mahfil parvāna jal rahā hai

vo āj-kal tavajjoh karte haiñ merī jānib

dil is liye ḳhushī se bāñsoñ uchhal rahā hai

pūchho usī ke dil se kyā vaqt kī hai qīmat

ġhaflat meñ 'umr kho kar jo haath mal rahā hai

dekhā hai mai-kade meñ ye rang shaiḳh jī kā

pagḌī uchhal rahī hai paañv phisal rahā hai

kis kis tarah se mujh ko vo aazmā rahe haiñ

maiñ mar rahā huuñ un kā armāñ nikal rahā hai

is kī nahīñ ḳhabar kuchh ghaTtī hai 'umr apnī

ham ye samajh rahe haiñ bas vaqt Tal rahā hai

gardan mirī uḌā kar qātil hai ābdīda

dekho mirī karāmat lohā pighal rahā hai

āñkhoñ pe terī zālim kyā paḌ gayā hai parda

ġhuncha samajh ke mere dil ko masal rahā hai

kyā chiiz zindagī hai kahte haiñ maut kis ko

ye mas.ala abhī tak mohtāj-e-hal rahā hai

qīmat meñ qadr meñ haiñ anmol she'r mere

dariyā-e-tab' apnā motī ugal rahā hai

jis daur meñ thā raa.ij guzrā vo daur 'bartar'

is daur meñ vafā kā sikka na chal rahā hai

ruKHsat hui jawani naqsha badal raha hai

tha naz tum ko jis par wo husn Dhal raha hai

ho jae kuchh se kuchh to kya hai maqam-e-hairat

ek ek pal mein rang-e-duniya badal raha hai

hai dil-lagi kisi ki haal-e-zabun kisi ka

hansti hai sham'-e-mahfil parwana jal raha hai

wo aaj-kal tawajjoh karte hain meri jaanib

dil is liye KHushi se banson uchhal raha hai

puchho usi ke dil se kya waqt ki hai qimat

ghaflat mein 'umr kho kar jo hath mal raha hai

dekha hai mai-kade mein ye rang shaiKH ji ka

pagDi uchhal rahi hai panw phisal raha hai

kis kis tarah se mujh ko wo aazma rahe hain

main mar raha hun un ka arman nikal raha hai

is ki nahin KHabar kuchh ghaTti hai 'umr apni

hum ye samajh rahe hain bas waqt Tal raha hai

gardan meri uDa kar qatil hai aabdida

dekho meri karamat loha pighal raha hai

aankhon pe teri zalim kya paD gaya hai parda

ghuncha samajh ke mere dil ko masal raha hai

kya chiz zindagi hai kahte hain maut kis ko

ye masala abhi tak mohtaj-e-hal raha hai

qimat mein qadr mein hain anmol she'r mere

dariya-e-tab' apna moti ugal raha hai

jis daur mein tha raij guzra wo daur 'bartar'

is daur mein wafa ka sikka na chal raha hai