rukte hue qadmon ka chalan mere liye hai

rukte hue qadmoñ kā chalan mere liye hai

sayyāra-e-hairat kī thakan mere liye hai

koī mirā aahū mujhe lā kar nahīñ detā

kahte to sabhī haiñ ki ḳhutan mere liye hai

tap sī mujhe aa jaatī hai āġhosh meñ us kī

vo barf ke gaale sā badan mere liye hai

haiñ jū-e-tab-o-tāb pe anvār ke pyāse

aur shaam kā ye sāñvalā-pan mere liye hai

qandhār na kābul na yaman mere liye hai

miTTī ke ujaḌne kī chubhan mere liye hai

bārūt meñ bhunte hue alfāz o mafāhīm

ab to yahī tasvīr-e-suḳhan mere liye hai

duniyā hī nahīñ ḳhud se ḳhafā rahtā huuñ 'arshad'

jiine kā ye andāz hī fan mere liye hai

rukte hue qadmon ka chalan mere liye hai

sayyara-e-hairat ki thakan mere liye hai

koi mera aahu mujhe la kar nahin deta

kahte to sabhi hain ki KHutan mere liye hai

tap si mujhe aa jati hai aaghosh mein us ki

wo barf ke gale sa badan mere liye hai

hain ju-e-tab-o-tab pe anwar ke pyase

aur sham ka ye sanwala-pan mere liye hai

qandhaar na kabul na yaman mere liye hai

miTTi ke ujaDne ki chubhan mere liye hai

barut mein bhunte hue alfaz o mafahim

ab to yahi taswir-e-suKHan mere liye hai

duniya hi nahin KHud se KHafa rahta hun 'arshad'

jine ka ye andaz hi fan mere liye hai