rukun to rukta hai chalne pe sath chalta hai

rukūñ to ruktā hai chalne pe saath chaltā hai

magar giraft meñ aatā nahīñ ki saaya hai

jhulas rahe haiñ badan dhuup kī tamāzat se

ki raat bhar baḌe zoroñ kā abr barsā hai

abhī to kal kī thakan jism se nahīñ niklī

sitam ki aaj kā din bhī pahāḌ jaisā hai

samajh rahe the jise ek mehrbāñ bādal

vo aag ban ke harī ketiyoñ pe barsā hai

vo ek shaḳhs jise aaj tak nahīñ dekhā

ḳhayāl-o-fikr pe us shaḳhs kā ijāra hai

dabīz pardoñ ke pīchhe na jhāñkiye ki vahāñ

ga.e dinoñ ko nishānī banā ke rakkhā hai

'shafīq' DhūñDne nikle the ghar se ham jis ko

vo kirchiyoñ kī tarah rāstoñ meñ bikhrā hai

rukun to rukta hai chalne pe sath chalta hai

magar giraft mein aata nahin ki saya hai

jhulas rahe hain badan dhup ki tamazat se

ki raat bhar baDe zoron ka abr barsa hai

abhi to kal ki thakan jism se nahin nikli

sitam ki aaj ka din bhi pahaD jaisa hai

samajh rahe the jise ek mehrban baadal

wo aag ban ke hari ketiyon pe barsa hai

wo ek shaKHs jise aaj tak nahin dekha

KHayal-o-fikr pe us shaKHs ka ijara hai

dabiz pardon ke pichhe na jhankiye ki wahan

gae dinon ko nishani bana ke rakkha hai

'shafiq' DhunDne nikle the ghar se hum jis ko

wo kirchiyon ki tarah raston mein bikhra hai