rumuz-e-gham se begane KHushi ka raaz kya jaanen

rumūz-e-ġham se begāne ḳhushī kā raaz kyā jāneñ

qazā se Darne vaale zindagī kā raaz kyā jāneñ

khulā jin par na rāz-e-girya-e-shabnam gulistāñ meñ

vo nādāñ ġhuncha-o-gul kī hañsī kā raaz kyā jāneñ

hañsī aatī hai ham ko hazrat-e-vā.iz kī bātoñ par

jo ḳhud mai-kash nahīñ vo mai-kashī kā raaz kyā jāneñ

jo ho ke rah ga.e ġham roz-e-raushan ke ujāloñ meñ

shab-e-ġham kī bhayānak tīrgī kā raaz kyā jāneñ

batā.eñge bhalā kyā ḳhizar ham ko raah manzil kī

vo ḳhud gum-karda-rah haiñ rahbarī kā raaz kyā jāneñ

butān-e-fitna-jū se kyā tavaqqo.a āshnā.ī kī

bhalā ye dushman-e-jāñ dostī kā raaz kyā jāneñ

koī aarif hī ai 'ummīd' use samjhe agar samjhe

ye farzāne mirī dīvāngī kā raaz kyā jāneñ

rumuz-e-gham se begane KHushi ka raaz kya jaanen

qaza se Darne wale zindagi ka raaz kya jaanen

khula jin par na raaz-e-girya-e-shabnam gulistan mein

wo nadan ghuncha-o-gul ki hansi ka raaz kya jaanen

hansi aati hai hum ko hazrat-e-waiz ki baaton par

jo KHud mai-kash nahin wo mai-kashi ka raaz kya jaanen

jo ho ke rah gae gham roz-e-raushan ke ujalon mein

shab-e-gham ki bhayanak tirgi ka raaz kya jaanen

bataenge bhala kya KHizar hum ko rah manzil ki

wo KHud gum-karda-rah hain rahbari ka raaz kya jaanen

butan-e-fitna-ju se kya tawaqqoa aashnai ki

bhala ye dushman-e-jaan dosti ka raaz kya jaanen

koi aarif hi ai 'ummid' use samjhe agar samjhe

ye farzane meri diwangi ka raaz kya jaanen