ruswai ka bhi hum par ilzam zaruri tha

rusvā.ī kā bhī ham par ilzām zarūrī thā

jo dil ne kamāyā hai vo naam zarūrī thā

marte hī rahe paiham aur jī ke nahīñ dekhā

ham bhuul ga.e shabnam jo kaam zarūrī thā

kartā jo vazāhat vo ham zinda kahāñ rahte

bātoñ meñ jo thā us kī ib.hām zarūrī thā

zahr-e-ġham-e-duniyā ke tiryāk kī ḳhātir se

zahar-e-ġham-e-jānāñ kā ik jaam zarūrī thā

ik umr diyā is ne jo saath vo kaafī hai

ab thak sā gayā thā dil ārām zarūrī thā

ruswai ka bhi hum par ilzam zaruri tha

jo dil ne kamaya hai wo nam zaruri tha

marte hi rahe paiham aur ji ke nahin dekha

hum bhul gae shabnam jo kaam zaruri tha

karta jo wazahat wo hum zinda kahan rahte

baaton mein jo tha us ki ibham zaruri tha

zahr-e-gham-e-duniya ke tiryak ki KHatir se

zahar-e-gham-e-jaanan ka ek jam zaruri tha

ek umr diya is ne jo sath wo kafi hai

ab thak sa gaya tha dil aaram zaruri tha