ruswai ke KHayal se Dar to nahin gae

rusvā.ī ke ḳhayāl se Dar to nahīñ ga.e

vo rāsta badal ke guzar to nahīñ ga.e

tark-e-ta.alluqāt se tum ko bhī kyā milā

ham bhī ġham-e-firāq se mar to nahīñ ga.e

ham pe taras na khā hameñ lāchār dekh kar

ham TuuT bhar ga.e haiñ bikhar to nahīñ ga.e

dariyā ke paar utar ke jalā.ī haiñ kashtiyāñ

nākām lauT ke kabhī ghar to nahīñ ga.e

daur-e-ḳhizāñ meñ sabza-o-shabnam kahāñ 'zafar'

palkoñ pe aa ke ashk Thahar to nahīñ ga.e

ruswai ke KHayal se Dar to nahin gae

wo rasta badal ke guzar to nahin gae

tark-e-talluqat se tum ko bhi kya mila

hum bhi gham-e-firaq se mar to nahin gae

hum pe taras na kha hamein lachaar dekh kar

hum TuT bhar gae hain bikhar to nahin gae

dariya ke par utar ke jalai hain kashtiyan

nakaam lauT ke kabhi ghar to nahin gae

daur-e-KHizan mein sabza-o-shabnam kahan 'zafar'

palkon pe aa ke ashk Thahar to nahin gae