rutba-e-dard ko jab apna hunar pahunchega

rutba-e-dard ko jab apnā hunar pahuñchegā

ham-nashīñ zabt-e-suḳhan kā bhī asar pahuñchegā

be-sadārāt se aajiz hai mirā dast-e-junūñ

koī din tā-ba-garebān-e-sahar pahuñchegā

khiñch ke rah mujh se magar zabt kī talqīn na kar

ab mirī aah se tujh ko na zarar pahuñchegā

bātoñ bātoñ meñ sab ahvāl-e-judā.ī mat pūchh

kuchh kahūñgā to tire dil pe asar pahuñchegā

rañj uThāte haiñ mire zabt-e-fuġhāñ se ham-sā.e

le ke tum tak koī marne kī ḳhabar pahuñchegā

mere marne se ġham-e-ishq na mar jā.egā

mujh ko chhoḌegā to ġham-ḳhvār ke ghar pahuñchegā

apne gesū to sambhālo ki khule jaate haiñ

varna ilzām mire shauq ke sar pahuñchegā

tum ko jiinā hai to kuchh aib bhī lāzim haiñ 'shahāb'

zindagī ko to na faizān-e-hunar pahuñchegā

rutba-e-dard ko jab apna hunar pahunchega

ham-nashin zabt-e-suKHan ka bhi asar pahunchega

be-sadaraat se aajiz hai mera dast-e-junun

koi din ta-ba-gareban-e-sahar pahunchega

khinch ke rah mujh se magar zabt ki talqin na kar

ab meri aah se tujh ko na zarar pahunchega

baaton baaton mein sab ahwal-e-judai mat puchh

kuchh kahunga to tere dil pe asar pahunchega

ranj uThate hain mere zabt-e-fughan se ham-sae

le ke tum tak koi marne ki KHabar pahunchega

mere marne se gham-e-ishq na mar jaega

mujh ko chhoDega to gham-KHwar ke ghar pahunchega

apne gesu to sambhaalo ki khule jate hain

warna ilzam mere shauq ke sar pahunchega

tum ko jina hai to kuchh aib bhi lazim hain 'shahab'

zindagi ko to na faizan-e-hunar pahunchega