ru-e-zamin nahin ki sar-e-asman nahin

rū-e-zamīñ nahīñ ki sar-e-āsmāñ nahīñ

sach pūchhiye to us ke nishāñ haiñ kahāñ nahīñ

ḳhud ham meñ aaj himmat o azm-e-javāñ nahīñ

varna pahuñch se duur kabhī āsmāñ nahīñ

bas ek zāt-e-haq ke sivā kā.enāt meñ

har shai fanā-pazīr hai kuchh jāvedāñ nahīñ

tum ne jo kuchh kahā so kahā apnā apnā zarf

aisā nahīñ ki mere dahan meñ zabāñ nahīñ

dil meñ hamāre hasrat-o-armāñ kā hai hujūm

kaise kaheñ ki ham pe koī mehrbāñ nahīñ

kar arz-e-mudda.ā magar ai dil rahe ḳhayāl

inkār kar diyā to karegā vo haañ nahīñ

'tābish' vo sāmne hī hai uḌtā huā ġhubār

bas do qadam se duur hai ab kārvāñ nahīñ

ru-e-zamin nahin ki sar-e-asman nahin

sach puchhiye to us ke nishan hain kahan nahin

KHud hum mein aaj himmat o azm-e-jawan nahin

warna pahunch se dur kabhi aasman nahin

bas ek zat-e-haq ke siwa kaenat mein

har shai fana-pazir hai kuchh jawedan nahin

tum ne jo kuchh kaha so kaha apna apna zarf

aisa nahin ki mere dahan mein zaban nahin

dil mein hamare hasrat-o-arman ka hai hujum

kaise kahen ki hum pe koi mehrban nahin

kar arz-e-muddaa magar ai dil rahe KHayal

inkar kar diya to karega wo han nahin

'tabish' wo samne hi hai uDta hua ghubar

bas do qadam se dur hai ab karwan nahin