ru-e-zeba ko dikhate hain chale jate hain

rū-e-zebā ko dikhāte haiñ chale jaate haiñ

kyuuñ nazar mujh se milāte haiñ chale jaate haiñ

hasrat-e-dil mirī rah jaatī hai dil hī meñ mire

farz kyā aise nibhāte haiñ chale jaate haiñ

aap se aisī tavaqqo.a na kabhī thī mujh ko

sham-e-ummīd bujhāte haiñ chale jaate haiñ

kuchh to ādāb-e-mohabbat kā kareñ pas-o-lihāz

kyā yūñhī dil ko lagāte haiñ chale jaate haiñ

chāragar haiñ to kareñ aa ke mirī chāragarī

dard-e-dil aur baḌhāte haiñ chale jaate haiñ

haar hī haar ho jaise mirī qismat meñ likhī

jiit kā jashn manāte haiñ chale jaate haiñ

tursh-rūī kabhī hotī nahīñ itnī achchhī

aate hī rañg jamāte haiñ chale jaate haiñ

yūñhī ghuT ghuT ke marūñ hijr meñ kab tak un ke

maut vo merī bulāte haiñ chale jaate haiñ

de ke darvāza-e-dil par mire aksar dastak

niiñd rātoñ kī uḌāte haiñ chale jaate haiñ

aap kā kyā hai jaleñge to jaleñge ham log

aap to aag lagāte haiñ chale jaate haiñ

raushnī aap kā darkār hai shāyad us se

ḳhāna-e-dil ko jalāte haiñ chale jaate haiñ

aap ko dil hai milānā to milā.eñ ba-ḳhushī

duur se haath milāte haiñ chale jaate haiñ

is se behtar thā ki aate na abhī mere paas

aap kuchh der ko aate haiñ chale jaate haiñ

aap se dil ko lagānā hai sazā mere liye

ḳhūn-e-dil merā jalāte haiñ chale jaate haiñ

kījiye kuchh to mohabbat kā mirī pas-o-lihāz

kyā isī tarah se aate haiñ chale jaate haiñ

aap kā farz hai apnī kahīñ merī bhī suneñ

hāl-e-dil apnā sunāte haiñ chale jaate haiñ

aap se kis ne kahā thā ki abhī aa jaa.eñ

aa ke 'barqī' ko satāte haiñ chale jaate haiñ

ru-e-zeba ko dikhate hain chale jate hain

kyun nazar mujh se milate hain chale jate hain

hasrat-e-dil meri rah jati hai dil hi mein mere

farz kya aise nibhate hain chale jate hain

aap se aisi tawaqqoa na kabhi thi mujh ko

sham-e-ummid bujhate hain chale jate hain

kuchh to aadab-e-mohabbat ka karen pas-o-lihaz

kya yunhi dil ko lagate hain chale jate hain

chaaragar hain to karen aa ke meri chaaragari

dard-e-dil aur baDhate hain chale jate hain

haar hi haar ho jaise meri qismat mein likhi

jit ka jashn manate hain chale jate hain

tursh-rui kabhi hoti nahin itni achchhi

aate hi rang jamate hain chale jate hain

yunhi ghuT ghuT ke marun hijr mein kab tak un ke

maut wo meri bulate hain chale jate hain

de ke darwaza-e-dil par mere aksar dastak

nind raaton ki uDate hain chale jate hain

aap ka kya hai jalenge to jalenge hum log

aap to aag lagate hain chale jate hain

raushni aap ka darkar hai shayad us se

KHana-e-dil ko jalate hain chale jate hain

aap ko dil hai milana to milaen ba-KHushi

dur se hath milate hain chale jate hain

is se behtar tha ki aate na abhi mere pas

aap kuchh der ko aate hain chale jate hain

aap se dil ko lagana hai saza mere liye

KHun-e-dil mera jalate hain chale jate hain

kijiye kuchh to mohabbat ka meri pas-o-lihaz

kya isi tarah se aate hain chale jate hain

aap ka farz hai apni kahin meri bhi sunen

haal-e-dil apna sunate hain chale jate hain

aap se kis ne kaha tha ki abhi aa jaen

aa ke 'barqi' ko satate hain chale jate hain