rudad mujhse dil ki sunai nahin gai

rūdād mujh se dil kī sunā.ī nahīñ ga.ī

is vāste ragoñ se duhā.ī nahīñ ga.ī

ik ḳhvāb to uThā liyā maiñ ne churā ke aañkh

ta.abīr us kī mujh se uThā.ī nahīñ ga.ī

go hijr puure shahr kī chaukhaT se uTh gayā

lekin mirī galī se judā.ī nahīñ ga.ī

patthar banā huā thā maiñ apne vajūd meñ

dariyā se merī laash uThā.ī nahīñ ga.ī

pushte maiñ bāñdhtā rahā apne vajūd par

lekin mire badan kī kaTā.ī nahīñ ga.ī

itnā hī farq hai mire aur qais meñ huzūr

bas mujh se apnī ḳhaak uḌaa.ī nahīñ ga.ī

chehre pe garche tū ne taġhāful sajā liyā

āñkhoñ se dil kī baat chhupā.ī nahīñ ga.ī

us bevafā se tark-e-ta.alluq to kar liyā

tasvīr us kī mujh se jalā.ī nahīñ ga.ī

rudad mujh se dil ki sunai nahin gai

is waste ragon se duhai nahin gai

ek KHwab to uTha liya main ne chura ke aankh

tabir us ki mujh se uThai nahin gai

go hijr pure shahr ki chaukhaT se uTh gaya

lekin meri gali se judai nahin gai

patthar bana hua tha main apne wajud mein

dariya se meri lash uThai nahin gai

pushte main bandhta raha apne wajud par

lekin mere badan ki kaTai nahin gai

itna hi farq hai mere aur qais mein huzur

bas mujh se apni KHak uDai nahin gai

chehre pe garche tu ne taghaful saja liya

aankhon se dil ki baat chhupai nahin gai

us bewafa se tark-e-talluq to kar liya

taswir us ki mujh se jalai nahin gai