ruh-e-ajdad ko jhinjhoD diya bachchon ne

rūh-e-ajdād ko jhiñjhoḌ diyā bachchoñ ne

saare hālāt kā ruḳh moḌ diyā bachchoñ ne

āḳhirī ek khilaunā thā rivāyat kā vaqār

bātoñ bātoñ meñ jise toḌ diyā bachchoñ ne

ghar kā har shaḳhs nazar aatā hai but patthar kā

jab se rishtoñ ko nayā moḌ diyā bachchoñ ne

zindagī aaj hai ik aise apāhij kī tarah

lā ke jañgal meñ jise chhoḌ diyā bachchoñ ne

aaj ke daur kī tahzīb kā patthar le kar

ek dīvāne kā sar phoḌ diyā bachchoñ ne

zad meñ aa jā.eñge sab shahr sabhī gaañv bhī

mauj-e-dariyā ko kidhar moḌ diyā bachchoñ ne

sab buzurgoñ ke tabassum ko dikhāvā kahiye

varna ye sach hai ki dil toḌ diyā bachchoñ ne

ruh-e-ajdad ko jhinjhoD diya bachchon ne

sare haalat ka ruKH moD diya bachchon ne

aaKHiri ek khilauna tha riwayat ka waqar

baaton baaton mein jise toD diya bachchon ne

ghar ka har shaKHs nazar aata hai but patthar ka

jab se rishton ko naya moD diya bachchon ne

zindagi aaj hai ek aise apahij ki tarah

la ke jangal mein jise chhoD diya bachchon ne

aaj ke daur ki tahzib ka patthar le kar

ek diwane ka sar phoD diya bachchon ne

zad mein aa jaenge sab shahr sabhi ganw bhi

mauj-e-dariya ko kidhar moD diya bachchon ne

sab buzurgon ke tabassum ko dikhawa kahiye

warna ye sach hai ki dil toD diya bachchon ne