ruh ka karb hai jine ki saza hone ko

ruuh kā karb hai jiine kī sazā hone ko

ham bhī haiñ terī tarah ḳhud se judā hone ko

laakh ho nashtar-e-ġham sīna-kushā hone ko

merā dāman nahīñ phūloñ kī qabā hone ko

zauq-e-parvāz sañvartā hai giraftārī se

ham tah-e-dām nahīñ aa.e rihā hone ko

aap qaa.il hoñ jafā ke to yahī kyā kam hai

kaun kahtā hai pashīmān-e-jafā hone ko

talḳhī-e-kām-o-dahan aa ga.ī dil tak saaqī

der kitnī hai dar-e-mai-kadā vā hone ko

maslak-e-dīda-varāñ ahl-e-havas kyā jāneñ

nā-rasī kahte haiñ manzil pe rasā hone ko

kis qadar garm hai bāzār-e-siyāsat-kārī

der lagtī nahīñ hañgāma bapā hone ko

husn ġhāfil nahīñ arbāb-e-vafā se lekin

koī to baat ho shāyān-e-jafā hone ko

hil na jaa.e kahīñ buniyād zamīn-e-dil kī

ġham kā tūfān hai ab had se sivā hone ko

ḳhafagī bhī tirī az-rāh-e-ināyat hai magar

log kyā samjheñge is tarah ḳhafā hone ko

muddatoñ ba.ad to ḳhvāb-e-shab-e-ishrat TuuTā

vaqt darkār hai ab hosh bajā hone ko

'shauq' zanjīr-e-anāsir mujhe kyā rokegī

hukm kī der hai zindāñ se rihā hone ko

ruh ka karb hai jine ki saza hone ko

hum bhi hain teri tarah KHud se juda hone ko

lakh ho nashtar-e-gham sina-kusha hone ko

mera daman nahin phulon ki qaba hone ko

zauq-e-parwaz sanwarta hai giraftari se

hum tah-e-dam nahin aae riha hone ko

aap qail hon jafa ke to yahi kya kam hai

kaun kahta hai pashiman-e-jafa hone ko

talKHi-e-kaam-o-dahan aa gai dil tak saqi

der kitni hai dar-e-mai-kada wa hone ko

maslak-e-dida-waran ahl-e-hawas kya jaanen

na-rasi kahte hain manzil pe rasa hone ko

kis qadar garm hai bazar-e-siyasat-kari

der lagti nahin hangama bapa hone ko

husn ghafil nahin arbab-e-wafa se lekin

koi to baat ho shayan-e-jafa hone ko

hil na jae kahin buniyaad zamin-e-dil ki

gham ka tufan hai ab had se siwa hone ko

KHafagi bhi teri az-rah-e-inayat hai magar

log kya samjhenge is tarah KHafa hone ko

muddaton baad to KHwab-e-shab-e-ishrat TuTa

waqt darkar hai ab hosh baja hone ko

'shauq' zanjir-e-anasir mujhe kya rokegi

hukm ki der hai zindan se riha hone ko