ruh ko qaid-e-ta’alluq se bhi aazad kiya

ruuh ko qaid-e-ta’alluq se bhī āzād kiyā

ham se jis tarh banā ham ne tumheñ yaad kiyā

kabhī kā'ba to kabhī dair ko ābād kiyā

ham ne har rang meñ har tarh unheñ yaad kiyā

har nafas baar thā mere liye hastī kā vajūd

chalo achchhā kiyā tum ne ise barbād kiyā

maiñ samajhtā huuñ vo koshish hai miTāne kī mirī

aap ne chupke se jo charḳh se irshād kiyā

ulTā hai 'ishq kā aa.iin ḳhudā terī panāh

vo ḳhafā baiThe haiñ kyoñ tū ne mujhe yaad kiyā

tum na pursish ke liye aa.e zamāna aayā

marte marte tumheñ 'rāfat' ne bahut yaad kiyā

ruh ko qaid-e-ta’alluq se bhi aazad kiya

hum se jis tarh bana hum ne tumhein yaad kiya

kabhi ka'ba to kabhi dair ko aabaad kiya

hum ne har rang mein har tarh unhen yaad kiya

har nafas bar tha mere liye hasti ka wajud

chalo achchha kiya tum ne ise barbaad kiya

main samajhta hun wo koshish hai miTane ki meri

aap ne chupke se jo charKH se irshad kiya

ulTa hai 'ishq ka aain KHuda teri panah

wo KHafa baiThe hain kyon tu ne mujhe yaad kiya

tum na pursish ke liye aae zamana aaya

marte marte tumhein 'rafat' ne bahut yaad kiya