ruh mein dard ka paiwand lagane wala

ruuh meñ dard kā paivand lagāne vaalā

terā har ḳhvāb hai palkoñ ko jalāne vaalā

ik tasavvur ke sivā raat ke sannāTe meñ

kaun hai band kivāḌoñ ko hilāne vaalā

merī hasrat hai salīqe se koī tiir chale

kyā yahāñ koī nahīñ Thiik nishāne vaalā

zid hai qātil ko use baḳhsh diyā jā.egā

jurm taslīm kare daar pe jaane vaalā

aaj kuchh dard kī shiddat meñ kamī hai shāyad

so gayā hai mire zaḳhmoñ kā jagāne vaalā

mujh ko yuuñ paḌh ke sabhī bhuul ga.e haiñ 'anjum'

jaise maiñ huuñ koī kirdār fasāne vaalā

ruh mein dard ka paiwand lagane wala

tera har KHwab hai palkon ko jalane wala

ek tasawwur ke siwa raat ke sannaTe mein

kaun hai band kiwaDon ko hilane wala

meri hasrat hai saliqe se koi tir chale

kya yahan koi nahin Thik nishane wala

zid hai qatil ko use baKHsh diya jaega

jurm taslim kare dar pe jaane wala

aaj kuchh dard ki shiddat mein kami hai shayad

so gaya hai mere zaKHmon ka jagane wala

mujh ko yun paDh ke sabhi bhul gae hain 'anjum'

jaise main hun koi kirdar fasane wala