ruh pe kya kya zarb lage hain jism ki khincha-tani mein

ruuh pe kyā kyā zarb lage haiñ jism kī khīñchā-tānī meñ

ishq kā hāsil dekh rahe haiñ ham donoñ hairānī meñ

ek mirā ā.īna-ḳhāna ek tumhāre jism kī lau

ḳhauf-zada dil soch rahā hai aag lage kab paanī meñ

ham ko kyā ma.alūm thā us ne kyā kyā chhupā ke rakhā thā

ham ne dupaTTa khīñch liyā thā shāne se nādānī meñ

paise de kar jism ḳharīdo lekin ye ehsās rahe

bhuuk nihāñ hotī hai aksar jismoñ kī uryānī meñ

jigrī yaar ke saath jo rakhā tab mujh par ye raaz khulā

ḳhūbiyāñ kitnī poshīda haiñ mere dushman-e-jānī meñ

hoñToñ se is dard kī ḳhushbū aa kar jism meñ phail ga.ī

kitnā dard ikaTThā thā is ThanDī sī peshānī meñ

jald hī us ko nochne vaale mil kar jashn manāeñge

taaza taaza phuul khilā hai gadle gadle paanī meñ

ruh pe kya kya zarb lage hain jism ki khincha-tani mein

ishq ka hasil dekh rahe hain hum donon hairani mein

ek mera aaina-KHana ek tumhaare jism ki lau

KHauf-zada dil soch raha hai aag lage kab pani mein

hum ko kya malum tha us ne kya kya chhupa ke rakha tha

hum ne dupaTTa khinch liya tha shane se nadani mein

paise de kar jism KHarido lekin ye ehsas rahe

bhuk nihan hoti hai aksar jismon ki uryani mein

jigri yar ke sath jo rakha tab mujh par ye raaz khula

KHubiyan kitni poshida hain mere dushman-e-jaani mein

honTon se is dard ki KHushbu aa kar jism mein phail gai

kitna dard ikaTTha tha is ThanDi si peshani mein

jald hi us ko nochne wale mil kar jashn manaenge

taza taza phul khila hai gadle gadle pani mein