rukhi roTi kama ke laya hun

rūkhī roTī kamā ke laayā huuñ

maiñ ki biivī ke sar kā saayā huuñ

ġhair ne kyoñ samajh liyā apnā

maiñ to apnoñ ko bhī parāyā huuñ

zulm kī fasl kaT ga.ī lekin

ek maiñ hī abhī baqāyā huuñ

ho ke majbūr bhuuk ke hāthoñ

shā.irī bechne pe aayā huuñ

bārhā jis ne mujh ko dhutkārā

aaj phir us se milne aayā huuñ

dost kī maañ jo maañ ke jaisī thī

ta.aziyat maiñ na karne paayā huuñ

aaj phir rizq kī talāsh meñ thā

phir se nākām lauT aayā huuñ

aaj beTī kā ghar basāyā hai

aaj phūle nahīñ samāyā huuñ

le uḌī mujh ko ek shahzādī

us kī āñkhoñ meñ yuuñ samāyā huuñ

merī harakat pe sab haiñ barham se

ahl-e-ḳhāna ko maiñ na bhāyā huuñ

ghar se jangal ko hijrateñ Thahrīñ

maiñ Thikāne pe apne aayā huuñ

aaj se mulk dushmanoñ kā 'rashīd'

rab ne chāhā to maiñ safāyā huuñ

rukhi roTi kama ke laya hun

main ki biwi ke sar ka saya hun

ghair ne kyon samajh liya apna

main to apnon ko bhi paraya hun

zulm ki fasl kaT gai lekin

ek main hi abhi baqaya hun

ho ke majbur bhuk ke hathon

shairi bechne pe aaya hun

barha jis ne mujh ko dhutkara

aaj phir us se milne aaya hun

dost ki man jo man ke jaisi thi

taziyat main na karne paya hun

aaj phir rizq ki talash mein tha

phir se nakaam lauT aaya hun

aaj beTi ka ghar basaya hai

aaj phule nahin samaya hun

le uDi mujh ko ek shahzadi

us ki aankhon mein yun samaya hun

meri harakat pe sab hain barham se

ahl-e-KHana ko main na bhaya hun

ghar se jangal ko hijraten Thahrin

main Thikane pe apne aaya hun

aaj se mulk dushmanon ka 'rashid'

rab ne chaha to main safaya hun