ruTha hua hai kab se manane ko aae hain

rūThā huā hai kab se manāne ko aa.e haiñ

uTh ai 'amīr-imām' bulāne ko aa.e haiñ

dā'vā nahīñ ki lā.eñge naddī nikāl kar

sahrā meñ sirf ḳhaak uḌāne ko aa.e haiñ

is baar rok le ki tire āstāñ pe ham

vāpas kabhī na lauT ke aane ko aa.e haiñ

aisā nahīñ ki zaḳhm lage haiñ faqat hameñ

ham se bhī chand zaḳhm zamāne ko aa.e haiñ

yaaro baḌā 'ajīb latīfa hai zindagī

aao suno ki hañsne-hañsāne ko aa.e haiñ

aa.e haiñ is galī meñ ki vo yaad aa sake

yā'nī use bhī aaj bhulāne ko aa.e haiñ

kyā thak ga.ī havā bhī ki ab tak nahīñ chalī

ye āḳhirī charāġh jalāne ko aa.e haiñ

shā.ista ḳhāmushī ho mubārak huzūr ko

duniyā meñ ham to shor machāne ko aa.e haiñ

maanā paḌī haiñ aur bhī lāsheñ paḌī raheñ

ham to bas apnī laash uThāne ko aa.e haiñ

ruTha hua hai kab se manane ko aae hain

uTh ai 'amir-imam' bulane ko aae hain

da'wa nahin ki laenge naddi nikal kar

sahra mein sirf KHak uDane ko aae hain

is bar rok le ki tere aastan pe hum

wapas kabhi na lauT ke aane ko aae hain

aisa nahin ki zaKHm lage hain faqat hamein

hum se bhi chand zaKHm zamane ko aae hain

yaro baDa 'ajib latifa hai zindagi

aao suno ki hansne-hansane ko aae hain

aae hain is gali mein ki wo yaad aa sake

ya'ni use bhi aaj bhulane ko aae hain

kya thak gai hawa bhi ki ab tak nahin chali

ye aaKHiri charagh jalane ko aae hain

shaista KHamushi ho mubarak huzur ko

duniya mein hum to shor machane ko aae hain

mana paDi hain aur bhi lashen paDi rahen

hum to bas apni lash uThane ko aae hain