ruThe hue ki apne zara ab manae zulf

rūThe hue ki apne zarā ab manā.e zulf

pyārā hai dil to naaz bhī dil ke uThā.e zulf

dar-guzre dil kī yaad se ham jaan to bachī

pīchhe paḌī hai jaan ke ab kyuuñ bulā.e zulf

vo kyuuñ batā.e ham ko dil-e-gum-shuda kā haal

pūchheñ janāb-e-ḳhizr to rasta batā.e zulf

bikhrā.e baal dekh liyā kis ko baam par

har vaqt haa.e zulf hai har lahza haa.e zulf

kis tarah un hasīnoñ ke bhartī rahī hai kaan

pahuñche na tere kaan meñ ai dil sadā-e-zulf

bal khā ke dosh-e-nāz se girnā idhar udhar

vo zulf aur haa.e vo kāfir adā-e-zulf

le kar balā.eñ ḳhud vo kashākash meñ paḌ gayā

dil zulf ko satā.e na dil ko satā.e zulf

phande meñ us ke tā.ir-e-dil aa rahegā aap

murġh-e-nazar ko daam meñ pahle phañsā.e zulf

paiñgā.e aur ye jaubanoñ kā rahnumā-e-dil

sad saala zāhidoñ ko to barsoñ jhulā.e zulf

āshuftagān-e-zulf kā barham hai kyuuñ mizāj

kahtā hai kaun koī na ho mubtalā-e-zulf

saa.e se us ke bhāgte haiñ log duur duur

bigḌī huī hai āj-kal aisī havā-e-zulf

tum naam un kī zulf ko rakhte ho kyuuñ 'riyāz'

sun le tū ek ek kī sau sau sunā.e zulf

ruThe hue ki apne zara ab manae zulf

pyara hai dil to naz bhi dil ke uThae zulf

dar-guzre dil ki yaad se hum jaan to bachi

pichhe paDi hai jaan ke ab kyun bulae zulf

wo kyun batae hum ko dil-e-gum-shuda ka haal

puchhen janab-e-KHizr to rasta batae zulf

bikhrae baal dekh liya kis ko baam par

har waqt hae zulf hai har lahza hae zulf

kis tarah un hasinon ke bharti rahi hai kan

pahunche na tere kan mein ai dil sada-e-zulf

bal kha ke dosh-e-naz se girna idhar udhar

wo zulf aur hae wo kafir ada-e-zulf

le kar balaen KHud wo kashakash mein paD gaya

dil zulf ko satae na dil ko satae zulf

phande mein us ke tair-e-dil aa rahega aap

murgh-e-nazar ko dam mein pahle phansae zulf

paingae aur ye jaubanon ka rahnuma-e-dil

sad sala zahidon ko to barson jhulae zulf

aashuftagan-e-zulf ka barham hai kyun mizaj

kahta hai kaun koi na ho mubtala-e-zulf

sae se us ke bhagte hain log dur dur

bigDi hui hai aaj-kal aisi hawa-e-zulf

tum nam un ki zulf ko rakhte ho kyun 'riyaz'

sun le tu ek ek ki sau sau sunae zulf