ruwansi sham hai baqi abhi to rat-jage honge

ruvāñsī shaam hai baaqī abhī to rat-jage hoñge

unheñ khone se pahle jaane kitne vasvase hoñge

vo kahte the nahīñ jī pā.eñge ho kar judā tum se

maiñ aksar sochtā huuñ kyā vo sach-much mar ga.e hoñge

hamāre TūTne meñ aap kā kuchh bhī nahīñ maanā

hamīñ shīsha rahe hoñge hamīñ patthar rahe hoñge

maiñ un kī yaad meñ din bhar yahī sab farz kartā huuñ

abhī ye kar rahe hoñge abhī vo kar rahe hoñge

ye lag-bhag ġhair-mumkin hai sabhī ko mutma.in rakhnā

vo jo sab kī nazar meñ haiñ bhale vo kyā bhale hoñge

hamāre zehn se pariyoñ ke qisse kyoñ nahīñ jaate

baḌe to haiñ magar kyā ham kabhī sach-much baḌe hoñge

paḌā rahne do apne haal par ham ko masīhāoñ

ki sūkhe zard patte bārishoñ se kyā hare hoñge

ruwansi sham hai baqi abhi to rat-jage honge

unhen khone se pahle jaane kitne waswase honge

wo kahte the nahin ji paenge ho kar juda tum se

main aksar sochta hun kya wo sach-much mar gae honge

hamare TuTne mein aap ka kuchh bhi nahin mana

hamin shisha rahe honge hamin patthar rahe honge

main un ki yaad mein din bhar yahi sab farz karta hun

abhi ye kar rahe honge abhi wo kar rahe honge

ye lag-bhag ghair-mumkin hai sabhi ko mutmain rakhna

wo jo sab ki nazar mein hain bhale wo kya bhale honge

hamare zehn se pariyon ke qisse kyon nahin jate

baDe to hain magar kya hum kabhi sach-much baDe honge

paDa rahne do apne haal par hum ko masihaon

ki sukhe zard patte barishon se kya hare honge