saaton ki nahin baat lamhon ki hai jism se ruh parwaz kar jaegi

sā.atoñ kī nahīñ baat lamhoñ kī hai jism se ruuh parvāz kar jā.egī

tum hamārī ḳhabar ko to kyā aaoge ab tumhī ko hamārī ḳhabar jā.egī

jis qayāmat se vaa.iz Darātā hai tū us qayāmat se kam ye qayāmat nahīñ

bār-hā dil pe guzrī hai jo hijr meñ bār-hā jaan par jo guzar jā.egī

mere chāragaro mere tan-parvaro, jaao tum kas liye niiñd khoTī karo

hijr kī raat lā-intihā raat hai ye qayāmat nahīñ jo guzar jā.egī

mere jiine na jiine meñ kyā farq hai merā jiinā na jiinā barābar hai ab

mujh ko marne hī do mujh ko marne hī do mere marne se duniyā na mar jā.egī

merī duniyā mirī zindagī tak hī hai aur ik din merī maut ke saath hī

ḳhātma merī duniyā kā ho jā.egā merī duniyā mire saath mar jā.egī

Darne vāloñ ko duniyā Darātī rahī Darne vāloñ ko duniyā Darātī rahe

tum Daroge na duniyā se lekin agar haar kar tum se duniyā hī Dar jā.egī

al-amāñ al-amāñ al-hazar al-hazar al-amāñ al-hazar terī nīchī nazar

tiir ban kar jigar meñ utar jā.egī dard kī Tiis rag rag meñ bhar jā.egī

lā.eñgī rañg lā.eñgī aa.heñ mirī rā.egāñ hī na jā.eñgī aa.heñ mirī

merī qismat to sañvre na sañvre magar zulf to us parī kī sañvar jā.egī

zindagī ko na hai aarzū ko 'vafā' hasrat-āgīñ hai donoñ kā shahr-e-vafā

zindagī aarzū meñ guzar jā.egī aarzū dil meñ ghuT ghuT ke mar jā.egī

saaton ki nahin baat lamhon ki hai jism se ruh parwaz kar jaegi

tum hamari KHabar ko to kya aaoge ab tumhi ko hamari KHabar jaegi

jis qayamat se waiz Daraata hai tu us qayamat se kam ye qayamat nahin

bar-ha dil pe guzri hai jo hijr mein bar-ha jaan par jo guzar jaegi

mere chaaragaro mere tan-parwaro, jao tum kas liye nind khoTi karo

hijr ki raat la-intiha raat hai ye qayamat nahin jo guzar jaegi

mere jine na jine mein kya farq hai mera jina na jina barabar hai ab

mujh ko marne hi do mujh ko marne hi do mere marne se duniya na mar jaegi

meri duniya meri zindagi tak hi hai aur ek din meri maut ke sath hi

KHatma meri duniya ka ho jaega meri duniya mere sath mar jaegi

Darne walon ko duniya Daraati rahi Darne walon ko duniya Daraati rahe

tum Daroge na duniya se lekin agar haar kar tum se duniya hi Dar jaegi

al-aman al-aman al-hazar al-hazar al-aman al-hazar teri nichi nazar

tir ban kar jigar mein utar jaegi dard ki Tis rag rag mein bhar jaegi

laengi rang laengi aahen meri raegan hi na jaengi aahen meri

meri qismat to sanwre na sanwre magar zulf to us pari ki sanwar jaegi

zindagi ko na hai aarzu ko 'wafa' hasrat-agin hai donon ka shahr-e-wafa

zindagi aarzu mein guzar jaegi aarzu dil mein ghuT ghuT ke mar jaegi