sada kaghaz pe koi nam kabhi likh lena!

saada kāġhaz pe koī naam kabhī likh lenā!

ho sake milne kī ik shaam kabhī likh lenā!

yuuñ to ham ahl-e-junūñ kuchh bhī nahīñ karte haiñ

gumrahī kā hī sahī kaam kabhī likh lenā!

mai-gusāroñ pe taḌapne kī bhī pābandī hai

tishna-kāmoñ ke liye jaam kabhī likh lenā!

kitnī raushan haiñ samundar kī chamaktī rāteñ

Dūbtī lahroñ kā anjām kabhī likh lenā!

bhuut ḳhvāboñ meñ farishte se nazar aate haiñ

zehn meñ apne ye auhām kabhī likh lenā!

toḌ ke kitnī chaTānoñ ko nikal aa.e haiñ

saare jazbe haiñ magar ḳhaam kabhī likh lenā!

bik rahā hai sar-e-bāzār har ik dānish-var

ham se āvāra ke kuchh daam kabhī likh lenā!

jurm koī nahīñ 'bāqar' ko rihā mat karnā

kuchh na kuchh DhūñD ke ilzām kabhī likh lenā!

sada kaghaz pe koi nam kabhi likh lena!

ho sake milne ki ek sham kabhi likh lena!

yun to hum ahl-e-junun kuchh bhi nahin karte hain

gumrahi ka hi sahi kaam kabhi likh lena!

mai-gusaron pe taDapne ki bhi pabandi hai

tishna-kaamon ke liye jam kabhi likh lena!

kitni raushan hain samundar ki chamakti raaten

Dubti lahron ka anjam kabhi likh lena!

bhut KHwabon mein farishte se nazar aate hain

zehn mein apne ye auham kabhi likh lena!

toD ke kitni chaTanon ko nikal aae hain

sare jazbe hain magar KHam kabhi likh lena!

bik raha hai sar-e-bazar har ek danish-war

hum se aawara ke kuchh dam kabhi likh lena!

jurm koi nahin 'baqar' ko riha mat karna

kuchh na kuchh DhunD ke ilzam kabhi likh lena!