saf baaton se ho gaya malum

saaf bātoñ se ho gayā ma.alūm

hote ho matlab-āshnā ma.alūm

kushta teġh-e-nigah se kījiyegā

chashm-o-abrū se ho gayā ma.alūm

ibtidā ne mohabbat-e-dil kī

ye na thī ham ko intihā ma.alūm

kuchh dahan hī nahīñ hai vo nāpaid

kamar-e-yār bhī hai nā-ma.alūm

dar tak us ke mirī rasā.ī ho

tujh se ai baḳht-e-nā-rasā ma.alūm

jab kahā roke tujh pe marte haiñ

hañs ke bolā vo but ḳhudā-ma.alūm

mehrbāñ āj-kal hai vo be-mehr

us meñ hotī hai kuchh duā ma.alūm

tum suḳhan-sāz ho baḌe ai jaan

tarz-e-taqrīr se huā ma.alūm

jab muamme meñ zikr-e-vasl kiyā

bolā matlab na kuchh huā ma.alūm

bad-gumāñ duḳht-e-raz se vaa.iz ho

ham ko hotī hai pārsā ma.alūm

le ke dil vo karegā bedardī

ye na Dhañg us kā qabl thā ma.alūm

qābil-e-ishq ye hasīn nahīñ

in daġhā-bāzoñ se vafā ma.alūm

jab kahā maiñ ne o taġhāful-kesh

haal hai mere ishq kā ma.alūm

misl-e-ā.īna hairatī huuñ qadīm

bolā lākhoñ haiñ aise kyā ma.alūm

haañ magar ham ko dekhā to hai kahīñ

hote ho sūrat-āshnā ma.alūm

sābiqa jab tak ai 'qalaq' na paḌe

haal insān kā ho kyā ma.alūm

saf baaton se ho gaya malum

hote ho matlab-ashna malum

kushta tegh-e-nigah se kijiyega

chashm-o-abru se ho gaya malum

ibtida ne mohabbat-e-dil ki

ye na thi hum ko intiha malum

kuchh dahan hi nahin hai wo napaid

kamar-e-yar bhi hai na-malum

dar tak us ke meri rasai ho

tujh se ai baKHt-e-na-rasa malum

jab kaha roke tujh pe marte hain

hans ke bola wo but KHuda-malum

mehrban aaj-kal hai wo be-mehr

us mein hoti hai kuchh dua malum

tum suKHan-saz ho baDe ai jaan

tarz-e-taqrir se hua malum

jab muamme mein zikr-e-wasl kiya

bola matlab na kuchh hua malum

bad-guman duKHt-e-raz se waiz ho

hum ko hoti hai parsa malum

le ke dil wo karega bedardi

ye na Dhang us ka qabl tha malum

qabil-e-ishq ye hasin nahin

in dagha-bazon se wafa malum

jab kaha main ne o taghaful-kesh

haal hai mere ishq ka malum

misl-e-aina hairati hun qadim

bola lakhon hain aise kya malum

han magar hum ko dekha to hai kahin

hote ho surat-ashna malum

sabiqa jab tak ai 'qalaq' na paDe

haal insan ka ho kya malum