saghar mein bhi Dhalti rahti hai sajdon mein bhi palti rahti hai

sāġhar meñ bhī Dhaltī rahtī hai sajdoñ meñ bhī paltī rahtī hai

ḳhvāhish hai bahar-hāl ek magar sau bhes badaltī rahtī hai

ādāb badalte rahte haiñ tahzīb badaltī rahtī hai

insān kī fitrat sāñche meñ hālāt ke Dhaltī rahtī hai

baat apne apne zarf kī hai dariyā kī matānat kyoñ ho ḳhafā

dariyā hī se vo bhī niklī hai jo nahr machaltī rahtī hai

is rāhguzār-e-imkāñ meñ arbāb-e-havas kī māzūrī

phūloñ kī tamanna dil meñ liye kāñToñ pe chaltī rahtī hai

ai ham-nafaso aaheñ na bharo nākām sahī māyūs na ho

ye kis ne kahā ġham kī āñdhī chaltī hai to chaltī rahtī hai

saudā-e-talab gumrāh sahī lekin ye natīja kyā kam hai

har silsila-e-naqsh-e-pā se ik raah nikaltī rahtī hai

imkān vahī paimāne vahī ruj.hān vahī afsāne vahī

dīvāne vahī 'ehsāñ' lekin zanjīr badaltī rahtī hai

saghar mein bhi Dhalti rahti hai sajdon mein bhi palti rahti hai

KHwahish hai bahar-haal ek magar sau bhes badalti rahti hai

aadab badalte rahte hain tahzib badalti rahti hai

insan ki fitrat sanche mein haalat ke Dhalti rahti hai

baat apne apne zarf ki hai dariya ki matanat kyon ho KHafa

dariya hi se wo bhi nikli hai jo nahr machalti rahti hai

is rahguzar-e-imkan mein arbab-e-hawas ki mazuri

phulon ki tamanna dil mein liye kanTon pe chalti rahti hai

ai ham-nafaso aahen na bharo nakaam sahi mayus na ho

ye kis ne kaha gham ki aandhi chalti hai to chalti rahti hai

sauda-e-talab gumrah sahi lekin ye natija kya kam hai

har silsila-e-naqsh-e-pa se ek rah nikalti rahti hai

imkan wahi paimane wahi rujhan wahi afsane wahi

diwane wahi 'ehsan' lekin zanjir badalti rahti hai