sahib-e-fahm-o-farasat jo hain ghar baiThe hain

sāhib-e-fahm-o-farāsat jo haiñ ghar baiThe haiñ

aur har moḌ pe kuchh sho.abda-gar baiThe haiñ

jis taraf sab haiñ udhar honā baḌī baat na thī

kuchh to uljhan hai jo ham aa ke idhar baiThe haiñ

āsmānoñ ke ishāre nahīñ samjhe ham ne

ab zamīnoñ pe sameTe hue par baiThe haiñ

ai mire dīda-varo kaun sī majbūrī hai

kyoñ jhukā.e hue darbār meñ sar baiThe haiñ

shab-parastoñ se nibhānā hai ta.alluq varna

ham chhupā.e hue muTThī meñ sahar baiThe haiñ

tū ne muḳhlis jinheñ samjhā hai nazar rakh un par

dost ban ke tirī kashtī meñ bhañvar baiThe haiñ

sher achchhā thā magar daad nahīñ mil paa.ī

maslahat oḌh ke sab ahl-e-nazar baiThe haiñ

aur phir dil kā kahā maan liyā thā 'tāriq'

ik yahī kār-e-nadāmat thā jo kar baiThe haiñ

sahib-e-fahm-o-farasat jo hain ghar baiThe hain

aur har moD pe kuchh shoabda-gar baiThe hain

jis taraf sab hain udhar hona baDi baat na thi

kuchh to uljhan hai jo hum aa ke idhar baiThe hain

aasmanon ke ishaare nahin samjhe hum ne

ab zaminon pe sameTe hue par baiThe hain

ai mere dida-waro kaun si majburi hai

kyon jhukae hue darbar mein sar baiThe hain

shab-paraston se nibhana hai talluq warna

hum chhupae hue muTThi mein sahar baiThe hain

tu ne muKHlis jinhen samjha hai nazar rakh un par

dost ban ke teri kashti mein bhanwar baiThe hain

sher achchha tha magar dad nahin mil pai

maslahat oDh ke sab ahl-e-nazar baiThe hain

aur phir dil ka kaha man liya tha 'tariq'

ek yahi kar-e-nadamat tha jo kar baiThe hain