sahib-e-sidq hun main KHauf-e-KHuda rakhta hun

sāhib-e-sidq huuñ maiñ ḳhauf-e-ḳhudā rakhtā huuñ

apne hoñToñ pe sadā haq kī sadā rakhtā huuñ

āj-kal jiine kā andāz judā rakhtā huuñ

apne dushman ke liye lab pe duā rakhtā huuñ

band kamre meñ koī baiTh ke kuchh bhī soche

maiñ khule dar kī tarah zehn khulā rakhtā huuñ

mausam-e-gul kī kisī choT kā shikva kaisā

maiñ to patjhaḌ meñ bhī har zaḳhm harā rakhtā huuñ

jaane kis haal meñ hogā vo mirā harjā.ī

jeb meñ aaj bhī maiñ jis kā patā rakhtā huuñ

us ke aane kī abhī aas nahīñ TuuTī hai

har darīche meñ diyā jaltā huā rakhtā huuñ

pārsā mujh ko samajhte haiñ zamāne vaale

aur maiñ pesh-e-nazar apnī ḳhatā rakhtā huuñ

mujh ko kuchh Dar nahīñ is daur ke fir.aunoñ kā

kyūñki muusā kī tarah maiñ bhī asā rakhtā huuñ

tum mujhe daar pe khīñcho yā mujhe qatl karo

dār-bardār huuñ maiñ azm nayā rakhtā huuñ

dostī yuuñ to hai is shahr meñ sab se lekin

apne dushman kā bhī ai 'shauq' patā rakhtā huuñ

sahib-e-sidq hun main KHauf-e-KHuda rakhta hun

apne honTon pe sada haq ki sada rakhta hun

aaj-kal jine ka andaz juda rakhta hun

apne dushman ke liye lab pe dua rakhta hun

band kamre mein koi baiTh ke kuchh bhi soche

main khule dar ki tarah zehn khula rakhta hun

mausam-e-gul ki kisi choT ka shikwa kaisa

main to patjhaD mein bhi har zaKHm hara rakhta hun

jaane kis haal mein hoga wo mera harjai

jeb mein aaj bhi main jis ka pata rakhta hun

us ke aane ki abhi aas nahin TuTi hai

har dariche mein diya jalta hua rakhta hun

parsa mujh ko samajhte hain zamane wale

aur main pesh-e-nazar apni KHata rakhta hun

mujh ko kuchh Dar nahin is daur ke firaunon ka

kyunki musa ki tarah main bhi asa rakhta hun

tum mujhe dar pe khincho ya mujhe qatl karo

dar-bardar hun main azm naya rakhta hun

dosti yun to hai is shahr mein sab se lekin

apne dushman ka bhi ai 'shauq' pata rakhta hun